ސަރުކާރުގެ ހަރަދުތައް ކުޑަކުރަން ހާއްސަ ފިޔަވަޅުތަކެއް އަޅަން ނިންމާފައިވައިނިކޮށް، ބޮޑު މުސާރައިގައި ހެލްތު މިނިސްޓްރީއަށް އިތުރު ޑެޕިއުޓީ މިނިސްޓަރަކު ހަމަޖައްސައިފި އެވެ.

އެ މަގާމަށް ރައީސް ޑރ. މުހައްމަދު މުއިއްޒު އައްޔަން ކުރައްވާފައި ވަނީ ގއ. ވިލިނގިލި، ފީރޯޒުގެ، ނަޒްލީން ނަޖީބެވެ. ނަޒްލީނަށް ރައީސް އޮފީހުން ފޮނުވި ސިޓީގައި ވަނީ އެ މަގާމަށް އޭނާ އައްޔަން ކުރެއްވީ ގާނޫނުއަސާސީގެ 115 ވަނަ މާއްދާގެ (ޅ) ގެ ދަށުން ރައީސުލްޖުމްހޫރިއްޔާއަށް ލިބިގެންވާ ބާރުގެ ދަށުން ކަމަށެވެ.

އޭނާގެ މުސާރަ އަކީ އިނާޔަތްތަކާއެކު ޖުމްލަ 35،000 ރުފިޔާ އެވެ.

ނަޒްލީނަކީ ޕީއެންސީ މަޖިލިސް ޕްރައިމަރީގައި ވާދަކޮށް ނާކާމިޔާބު ލިބުނު މީހެކެވެ.

ރައީސް އޮފީހުގެ ވެބްސައިޓްގައިވާގޮތުން ނަޒްލީން ނުހިމެނޭގޮތަށް ހެލްތު މިނިސްޓްރީގައި ހަތަރު ނައިބުން އެބަތިއްބެވި އެވެ.

ގާނޫނުއަސާސީގެ 115 ވަނަ މާއްދާގެ (ޅ) ގެ ދަށުން ރައީސުލްޖުމްހޫރިއްޔާ މަގާމްތަކަށް މީހުން އައްޔަން ކުރެއްވުމުން ސަރުކާރުން ދަނީ އެކަން ސިއްރުކުރަމުންނެވެ.

ސިޔާސީ މަގާމްތަކަށް ބޮޑު މުސާރައިގައި މީހުން އައްޔަން ކުރަމުންދާއިރު، ސަރުކާރުން އަންނަނީ އާދައިގެ ވަޒީފާތަކުގައި ތިބޭ މީހުން ވަޒީފާއިން ވަކިކުރަމުންނެވެ. އެ މީހުން ވަޒީފާތަކުން ވަކިކުރަނީ ހަރަދު ކުޑަކުރުމަށް ކަމަށްބުނެ އެވެ.