ބްލެކްމާކެޓްގައި ޑޮލަރު މާރުކުރާކުރުން ނިނުމަކަށް ގެންނާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ވެރިކަންކުރާ ޕީއެންސީގެ ހަރުގޭގައި މިރޭ ބޭއްވި ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ ބްލެކްމާކެޓްގައި ޑޮލަރު މާރުކުރާ ކުރުން ނިމުމަކަށް ގެނައުމަށް ކަމާބެހޭ ގަވާއިދުތަކަށް ބަދަލުތަކެއް ގެންނާނެ ކަމަށް އެމްއެމްއޭގެ ގަވަރުނަރު އަހްމަދު މުނައްވަރު ވިދާޅުވެފައިވާ ކަމަށެވެ.

ރައީސް ވިދާޅުވީ އެމްއެމްއޭ އިން އެ ބަދަލުތައް ގެނައުމުން ސީދާ ބޭންކަށް ޑޮލަރު މާރުކުރަންޖެހޭގޮތަށް ކަންކަން ބަދަލުވާނެ ކަމަށެވެ. އަދި ބޭރު ފައިސާ މާރުކުރާ ތަންތަން ވެސް ބޭންކުތަކާ ގުޅޭނެ ކަމަށް އެމަނިކުފާނު ވިދާޅުވި އެވެ.

"އަޅުގަނޑުމެންގެ ރާއްޖޭގައި ބޭރު ފައިސާއިން އާމްދަނީ ލިބޭ ވަރަށް ގިނަ ވިޔަފާރިތައް އެބަ ހިންގާ، މަނީ ޗެންޖާސް ރެގިއުލޭޝަންއަށް ގެނެވޭ ބަދަލުގެ ސަބަބުން އެ ފައިސާ ބްލެކް މާކެޓްގައި މި މާރު ކުރާ މާރުކުރުން ނިމުމަކަށް އައިސް، ބޭންކަށް މާރުކުރުން މަޖުބޫރުވާނެ. ވަރަށް ގިނަ މީހުން ރުޅިއައިސް ދާނެ އަޅުގަނޑުމެން ދެކެ. އެކަމަކު އަޅުގަނޑު ހުންނާނީ ރައްޔިތުންގެ ފަޅީގައި،" ރައީސް ވިދާޅުވި އެވެ.

މީގެއިތުރުން ރައީސް ވިދާޅުވީ ބީއެމްއެލްގެ ބޯޑުން އިއްޔެ ނިންމުން ނިންމީ ސީދާ އެމަނިކުފާނު އެކަން ނުކުރަން ނިންމާފައި ވަނިކޮށް ކަމަށެވެ. އަދި އެއީ ރޭވިގެން ހިންގަން އުޅުނު ބަޣާވާތެއް ކަމަށް ރައީސް ވިދާޅުވި އެވެ.

"މި ކުރި ކަންތައް، ސަލާމަތް ބުއްދި ހުރި ކޮންމެ މީހަކު މި ދެންނެވި ހުރިހާ ޑޮޓުތަކެއް ގުޅިގެންދާކަން އެނގޭނެ، މިކުރި ކަންތައް މިއީ، ހަމަ ޝިޔާމު [މިނިސްޓަރު ޝިޔާމު] ވެސް ފާހަގަކުރެއްވި ގޮތަށް ވާނީ ހަމަ އެޓެމްޕެޑް ކޫއަކަށް، އެކުރި ބަޔަކު ކުރީ،" ރައީސް މުއިއްޒު ވިދާޅުވި އެވެ.

ރައީސް މިފަދައިން ވިދާޅުވިއިރު، ބީއެމްއެލްގެ އެ ނިންމުމަކީ ބޭންކަށް ޑޮލަރު ނުލިބޭތީ ނިންމި ނިންމުމެއް ކަމަށް ހިތަދޫ މެދު ދާއިރާގެ މެމްބަރު އަހްމަދު އަޒާން ވަނީ ވިދާޅުވެފަ އެވެ.