ޕްރޮސިކިއުޓާ ޖެނެރަލް ހުސައިން ޝަމީމް މަގާމުން އިސްތިއުފާ ދެއްވައިފި އެވެ.

ޝަމީމް މަގާމުން އިސްތިއުފާ ދެއްވީ އޭނާ މަގާމުން ވަކިކުރަން މަޖިލީހުގެ ޖުޑިޝަރީ ކޮމިޓީން މިއަދު ފާސްކޮށްފައި ވަނިކޮށެވެ. ޝަމީމް މަގާމުން ވަކިކުރަން މަޖިލީހަށް ހުށަހެޅުއްވީ ވެރިކަންކުރާ ޕީއެންސީއަށް ނިސްބަތްވާ ހުޅުދޫ ދާއިރާގެ މެމްބަރު މުހައްމަދު ޝާހިދެވެ.

ޝަމީމް ވަނީ މަގާމުން އިސްތިއުފާ ދެއްވިކަން އާންމުކޮށް އިއުލާން ކުރައްވާފަ އެވެ.

"އަޅުގަނޑުގެ މައްޗަށް ތުހުމަތުކުރެވޭ ކަންކަން އާންމުކޮށް އިއުލާނު ކުރައްވާފައި، އެ ކަންކަމަށް އަޅުގަނޑު ދޭން އޮތް ޖަވާބު، އާންމުންނަށް ނުއިވޭގޮތަށް ސިއްރުކުރުމަކީ، އަދުލް އިންސާފުގެ ހަމަތަކާއި ނެޗުރަލް ޖަސްޓިސްގެ އުސޫލުތަކާވެސް ހިލާފު ކަމަކަށްވާތީ، މިކަންކަމާ އިހުތިޖާޖުކުރުމުގެ ގޮތުން، ގާނޫނުއަސާސީގެ 226 ވަނަ މާއްދާގައިވާ ގޮތުގެ މަތިން، ޕްރޮސިކިއުޓާ ޖެނެރަލްގެ މަޤާމުން އަޅުގަނޑު އިސްތިއުފާ ދީފިން،" ޝަމީމް ވިދާޅުވި އެވެ.

ޝަމީމް މަގާމުން ވަކިކުރުމުގެ މައްސަލަ އެޖެންޑާކޮށްފައިވާ މަޖިލީހުގެ ޖަލްސާ މިހާރު ކުރިއަށް އެބަދެ އެވެ. މަޖިލީހުގެ ޖަލްސާގެ ރިޔާސަތުގައި އިންނެވި ނައިބު ރައީސް އަހްމަދު ނާޒިމް ވިދާޅުވީ ޝަމީމް އިސްތިއުފާގެ ސިޓީ ލިބިފައިވާ ކަމަށް ރައީސް އޮފީހުން އަންގާފައިނުވާ ކަމަށެވެ. އެހެންކަމުން ޝަމީމް އިސްތިއުފާދެއްވި ކަމަށް މަޖިލީހަށް އަދި ކަށަވަރު ނުކުރެވޭނެ ކަމަށް އޭނާ ވިދާޅުވި އެވެ.