ޓެކްސް އެޕީލް ޓްރައިބިއުނަލްގެ ހަތަރު މެންބަރުން މަގާމުން ވަކިކުރަން ރައީސުލްޖުމްހޫރިއްޔާއަށް ލަފާ ދިނުމަށް ރައްޔިތުންގެ މަޖިލީހުގެ ޖުޑިޝަރީ ކޮމެޓީން މިއަދު ނިންމައިފި އެވެ.

ޓްރައިބިއުނަލްގެ ފަސް މެންބަރުންގެ ތެރެއިން ހަތަރު މެންބަރުން ވަކިކުރުމަށް ލަފާދިނުމަށް ކޮމިޓީން ނިންމާފައިވަނީ، އެ މެންބަރުން ނުފޫޒު ބޭނުންކޮށްގެން ވަކި ގޮތަކަށް މައްސަލަ ނިންމައި، ކޮރަޕްޝަންގެ އަމަލުތައް ހިންގާކަން ފާހަގަވެފައިވާތީ އެވެ.

ވަކިކުރަން ނިންމި ހަތަރު މެންބަރުންނަކީ ޓެކްސް އެޕީލް ޓްރައިބިއުނަލްގެ ރައީސް މުހައްމަދު މުނައްވަރު އަލީ، ނައިބު ރައީސް ހުސެއިން ޒައިދާންގެ އިތުރުން ދެ މެންބަރުން ކަމަށްވާ ހަދީޖާ ނައީމްއާއި އަހުމަދު އަޝްރަފު އެވެ.

މި މައްސަލަ މަޖިލީހަށް ހުށަހެޅުއްވީ ޓަރައިބިއުނަލްގެ މެންބަރު އިސްމާއިލް ސާޖިދެވެ. ސާޖިދު ކޮމެޓީއަށް ހުށަހެޅި އެ މައްސަލައާ ގުޅިގެން ކޮމެޓީން ވަނީ މެންބަރުން ހާޒިރުކޮށް ސުވާލު ކޮށްފަ އެވެ. އެ ބައްދަލުވުން ކުރިއަށް ގެންދިޔައީ ސިއްރުންނެވެ. އޭގެ ފަހުން ކޮމެޓީ މެންބަރުން ވަނީ ޓްރައިބިއުނަލްއަށް ގޮސް އެތަނުގެ ހާލަތު ވެސް ބަލާފަ އެވެ.

މިއަދު ބޭއްވި ޖުޑިޝަރީ ކޮމެޓީގައި ހަތަރު މެންބަރަކު ވަކިކުރަން ހުށަހަޅުއްވަމުން ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު ވިދާޅުވީ އެ އިދާރާއިން ފާހަގަކުރެވުނު މައްސަލަތަކަށް ބަލާއިރު، މައްސަލަ ނިންމަނީ އިންސާފުވެރިކޮށް ނޫން ކަމަށާއި، މަގާމުގެ ނުފޫޒު ބޭނުން ކުރާކަން ފާހަގަވެފައިވާ ކަމަށެވެ. އެހެންކަމުން އެ މެންބަރުން ވަކިކުރުމަކީ އެންމެ އިންސާފުވެރި ގޮތް ކަމަށް އޭނާ ވިދާޅުވި އެވެ.

އެ މީހުން ނުހައްގު މުއްސަނދިކަން ހޯދައި ހިންގި ކޮރަޕްޝަންގެ މައްސަލަ އެންޓި ކޮރަޕްޝަން ކޮމިޝަން (އޭސީސީ) އަށް ހުށަހެޅުމަށާއި، މައްސަލަތައް ބަލާ ބެންޗު ވަކި ތަރުތީބަކުން އެކުލަވާލުމަށް އެތަނުގެ ގަވާއިދު އިސްލާހު ކުރުމަށް އެންގުމަށްވެސް ކޮމިޓީން ނިންމާފައިވ އެވެ. އެގޮތަށް އަންގަން ނިންމާފައި ވަނީ، މިހާރު ގަވާއިދު އޮތް ގޮތުން މައްސަލައިގައި ހިމެނޭ ފައިސާގެ އަދަދުގެ ކުޑަ ބޮޑުމިނަށް ބަލައި ޓްރައިބިއުނަލްގެ ރައީސަށް ބޭނުން ގޮތަކަށް ބެންޗު އެތުރުމުގެ ބާރު އޮތުމުން އެއީ އިންސާފުވެރި ގޮތަކަށް ނުވާތީ ކަމަށްވެސް ކޮމީޓީން ބުނެ އެވެ.

މީގެ އިތުރުން އެތަން ހިންގާ އިމާރާތަކީ ކުރަން ޖެހޭ މަސައްކަތަށް ވުރެ ބޮޑު އިމާރާތަކަށްވާތީ، ދައުލަތުން ކުރަން ޖެހޭ ހަރަދު ކުޑަ ކުރުމަށް، ކަމާ ގުޅުން ހުރި އިދާރާތަކާ ގުޅިގެން އެކަމަށް ހައްލު ގެނައުމަށް އެ އިދާރާއަށް އެންގުމަށްވެސް ކޮމިޓީން ވަނީ ނިންމާފަ އެވެ.