މިހާރު ކުރިއަށްދާ ރައްޔިތުންގެ މަޖިލިސް ޖަލްސާގައި ހަމަނުޖެހުން ބޮޑުވެ، މަޖިލިސް ހަތަރު މެންބަރެއްގެ ނަން އިއްވާ ޖަލްސާއިން ބޭރުކޮށްފި އެވެ.

މިއަދުގެ ޖަލްސާގައި ނަން އިއްވައި ޖަލްސާއިން ނިކުންނެވުމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އެންގެވީ، އެމްޑީޕީއަށް ނިސްބަތްވާ ހަތަރު މެންބަރުން ކަމަށްވާ، ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސެއިން ޒިޔާދާއި، ހިތަދޫ ދެކުނު ދާއިރާގެ މެންބަރު އަދި އެމްޑީޕީ ޕީޖީ ގްރޫޕްގެ ލީޑަރު އިބްރާހިމް ނާޒިލް އާއި ކެންދޫ ދާއިރާގެ މެންބަރު މައުރޫފު ޒާކިރު އާއި ކެޔޮދޫ ދާއިރާގެ މެންބަރު މުހައްމަދު ނިއުޝާދުއަށެވެ.

މިއަދުގެ ޖަލްސާގައި ވަޒީރުންނާ ސުވާލު ކުރުމުގެ ވަގުތުގައި ކުރިއަށް ދަނީ ހައުސިން މިނިސްޓަރު އަލީ ހައިދަރާއި ސުވާލު ކުރުމެވެ.

މައްސަލަ ހޫނުވެފައި ވަނީ ވައިކަރަދޫ މެންބަރު ޒިޔާދު ކުރެއްވި ސުވާލަކަށް މިނިސްޓަރު ސާފު ޖަވާބެއް ނުދެއްވުމުންނެވެ. މެންބަރުން އެކަމާ ހިތްހަމަނުޖެހި މަޖިލިސް ތަޅުމުގައި އަޑުގަދަ ކުރައްވަން ފެއްޓެވުމުން ނަން އިއްވަވާ މަޖިލިސް ދޫކޮށް ނުކުތުމަށް މަޖިލިސް ރިޔާސަތުން ވަނީ އަންގަވާފަ އެވެ.

ޒިޔާދު ކުރެއްވި ސުވާލަކީ، ކުރީގެ ސަރުކާރުން ދީފައިވާ ގޯއްޗާއި ފްލެޓު އަތުނުލާނެ ކަމަށް ވައުދުވުމަށްފަހު އެ ސިޔާސަތު މިނިސްޓްރީން ބަދަލު ކުރީ ރައީސް މުހައްމަދު މުއިއްޒުއާ މަޝްވަރާ ކުރައްވާފައިތޯ އެވެ.

އެ ސުވާލުގެ ޖަވާބުގައި މިނިސްޓަރު ހައިދަރު ވިދާޅުވީ ފްލެޓާއި ގޯތި އެއްވެސް މީހެއްގެ އަތުން އަތުލާނީ ލިބިފައި ވަނީ ހައްގުވެރިންނަށްތޯ ނުވަތަ ނޫންތޯ ބެލުމަށްފަހު ކަމަށެވެ.