އިންޑިއާގެ ލައިން އޮފް ކްރެޑިޓް ފެސިލިޓީގެ ދަށުން ކުރިއަށްގެންދިޔަ އައްޑޫ ސިޓީގެ ބިން ހިއްކުމާއި، ގޮނޑުދޮށް ހިމާޔަތްކުރުމާއި، ހަންކެޑެ ބްރިޖު މަސައްކަތް ނިންމާ ދިވެހި ސަރުކާރާ ހަވާލުކޮށްފި އެވެ.

މި މަޝްރޫއުތައް ދިވެހި ސަރުކާރާ ހަވާލުކޮށްފައި ވަނީ އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިޔަމް ޖައިޝަންކަރު މިހާރު ރާއްޖެ އަށް ކުރައްވަމުން ގެންދަވާ ދަތުރުގެ ތެރެއިން މިއަދު އައްޑޫ އަށް ވަޑައިގެން ބޭއްވި ރަސްމިއްޔާތުގަ އެވެ.

މަޝްރޫއުތަކާ ދިވެހި ސަރުކާރުގެ ފަރާތުން ހަވާލުވެވަޑައިގަތީ ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތޮލިބާއި ފޮރިން މިނިސްޓަރު މޫސާ ޒަމީރެވެ.

ހަންކެޑެ ބްރިޖަކީ އިންޑިއާގެ އެގްޒިމް ބޭންކުން ލިބިފައިވާ 800 މިލިއަން ޑޮލަރުގެ ލައިން އޮފް ކްރެޑިޓުގެ ދަށުން ހިންގި މަޝްރޫއެކެވެ. އެ މަސައްކަތް އިންޑިއާގެ އެފްކޮންސް ކުންފުންޏާ ހަވާލުކުރީ އޮކްޓޫބަރު 2021 ގަ އެވެ.

ކޮންސްޓްރަކްޝަން މިނިސްޓްރީން ބުނީ، އައްޑޫ ސިޓީގެ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއުގެ ތެރެއިން ޖުމްލަ 184.3 ހެކްޓަރުގެ ބިން ހިއްކާފައިވާ ކަމަށެވެ، އެގޮތުން ހިތަދޫގެ ދެ ސަރަހައްދެއް ހިމެނޭހެން 80 ހެކްޓަރު، މަރަދޫ އަދި މަރަދޫފޭދޫގައި 76 ހެކްޓަރު، އައްޑޫ ޑީޓުއާ ލިންކްގެ އެންބޭންކްމަންޓަށް ބޭނުންވާ 3.3 ހެކްޓަރު އަދި ފަތުރުވެރިކަމަށް ހާއްސަކޮށް 8.3 ހެކްޓަރުގެ ތިން ރަށެއް ވަނީ ހިއްކާފައި ކަމަށް އެ މިނިސްޓްރީން ބުނެ އެވެ.

މީގެ އިތުރުން ހިއްކާފައިވާ ސަރަހައްދުތަކުގެ ގޮނޑުދޮށް ހިމާޔަތް ކުރުމުގެ ގޮތުން ހިތަދޫ، މަރަދޫ، މަރަދޫފޭދޫ، އަދި ހަންކެޑެ ބްރިޖު ހިމެނޭ ސަރަހައްދުގައި ބޮޑު ހިލަ ވަނީ ޖަހާފައެވެ. ފަތުރުވެރިކަމަށް ހާއްސަކޮށް ހިއްކާފައިވާ ތިން ރަށުގެ ގޮނޑުދޮށް ހިމާޔަތް ކުރުމަށް 4.1 ކިލޯމީޓަރުގެ ޖިއޯޓިއުބް ތޮށިލުމުގެ މަސައްކަތް ވެސް ވަނީ ނިންމައިފަ އެވެ.

މި މަޝްރޫއުގެ ތެރެއިން ހިތަދޫ ޒޯން 2 ގައި ތަރައްގީކޮށްފައިވާ ބީޗަކީ މިހާތަނަށް ރާއްޖޭގައި ތަރައްގީކޮށްފައިވާ އެންމެ ދިގު އާޓިފިޝަލް ބީޗް ކަމަށް ކޮންސްޓްރަކްޝަން މިނިސްޓްރީން ބުނެ އެވެ.