ރައީސް ޑރ. މުހައްމަދު މުއިއްޒުގެ ވެރިކަމުގައި އެޗްޑީސީން ވަޒީފާ ދިން މީހުންގެ އަދަދާއި ވަޒީފާއިން ވަކިކުރި މީހުންގެ އަދަދު ސިއްރުކޮށްފި އެވެ.

މައުލޫމާތު ހޯދައި ލިބިގަތުމުގެ ގާނޫނުގެ ދަށުން މައުލޫމާތު ހޯދަން "ހުރިހާ" އިން އެ ކުންފުންޏަށް ހުށަހެޅި އާރްޓީއައި އަކަށް ދިން ޖަވާބުގައި ވަނީ އެއީ ތިން ވަނަ ފަރާތެއްގެ ޒާތީ މައުލޫމާތު ކަމަށް ވާތީ ހާމަކުރެވެން ނެތް ކަމަށެވެ.

އެ ފަރާތުން އެދުނީ ޖުލައި އެއްވަނަ ދުވަހާ ހަމައަށް އެ ކުންފުނިން ވަޒީފާ ދިން އަދި ވަޒީފާއިން ވަކިކުރި މީހުންގެ ނަމާއި އެޑްރެސް އަދި މުސާރައާ އިނާޔަތްތައް ހޯދުމަށެވެ.

އެޗްޑީސީން މި މައުލޫމާތު ހިއްސާކުރަން ދެކޮޅު ހަދާފައިވާއިރު، ރައީސް ޑރ. މުހައްމަދު މުއިއްޒު ވިދާޅުވަފައި ވަނީ މި ސަރުކާރުން ފޮރުވާނެ އެއްވެސް އެއްޗެއް ނޯންނާނެ ކަމަށާއި ހުރިހާ އާރްޓީއައި ތަކަށް ވެސް ވާނީ ޖަވާބު ދީފައި ކަމަށް އެމަނިކުފާނު ވިދާޅުވި އެވެ.

ނިމިދިޔަ މަޖިލިސް އިންތިހާބާ ދިމާކޮށް ގިނަ އަދަދެއްގެ ބަޔަކަށް އެކި ކުންފުނިތަކުން ވަޒީފާ ދީފައިވެ އެވެ. ނަމަވެސް ވަޒީފާ ދިން މީހުންގެ މައުލޫމާތު އަންނަނީ ސިއްރު ކުރަމުންނެވެ.