ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ ނައިބު ރައީސް މަގާމުގައި ހުންނެވި މުހައްމަދު ފިރާޒް އެ މަގާމުން ވަކިކޮށްފި އެވެ.

މުހައްމަދު ފިރާޒް ވަނީ ޕީސީބީގައި ކުރެވުނު މަސައްކަތްތަކާމެދު ހިތްހަމަޖެހޭކަން ހާމަކޮށް އެކްސްގައި ޕޯސްޓެއް ކުރައްވައިފަ އެވެ. މަގާމުން ވަކިކުރި ސަބަބު ވިދާޅުވެފައެއް ނުވެ އެވެ.

ޕީސީބީން މިކަމާ ގުޅިގެން ބުނެފައިވަނީ ބޯޑުގެ ނައިބު ރައީސް މުހައްމަދު ފިރާޒް 25 ޖުލައި 2024 ވަނަ ދުވަހު މަގާމުން ވަކިކުރައްވާފައިވާ ކަމަށެވެ. ފިރާޒް ބޯޑަށް ކޮށްދެއްވި ހިދުމަތްތަކަށް ޝުކުރު ދަންނަވާފައިވެ އެވެ.

ސަރުކާރުގެ ކުންފުނިތަކަށް ޑިރެކްޓަރުން އައްޔަންކޮށް، އެ ތަންތަން ބަލަހައްޓާ ޕީސީބީގެ ބޯޑަށް އެންމެ ފަހުން ތިން މެންބަރުން ރައީސް މުހައްމަދު މުއިއްޒު އައްޔަން ކުރެއްވީ 2023 ވަނަ އަހަރު ފަހުކޮޅު އެވެ. ކުރިން އެ ބޯޑުގައި ތިއްބެވި ބޭފުޅުންގެ ދައުރު ހަމަވުމުން ކުރީގެ ސަރުކާރުން އޮތީ އެ ބޯޑަށް ބޭފުޅުން އައްޔަން ނުކޮށެވެ.

ފިރާޒް ޕީސީބީގެ ނައިބު ރައީސްކަމަށް އައްޔަން ކުރުމަށް ރައްޔިތުންގެ މަޖިލީހުން ރުހުން ދީފައިވަނީ 2022 ވަނަ އަހަރު ނޮވެމްބަރު މަހު އެވެ. އޭގެ ފަހުން އޭނާ ސަރުކާރު ހިންގާ ޕީއެންސީ މެންބަރެއްގެ ގޮތުގައި ޕާޓީގެ ރަޖިސްޓްރީގައި އޮތް މައްސަލަ ވަނީ މަޖިލީހުގެ ސަމާލުކަމަށް އައިސްފަ އެވެ. ނަމަވެސް އެކަން އެ ބޯޑުގެ ރައީސް ހަމްދީ އަގީލް އޭރު ދޮގު ކުރެއްވި އެވެ.

ދައުލަތުގެ ވިޔަފާރި ތަންތަން ޕްރައިވަޓައިޒް ކުރުމާއި ކޯޕަރަޓައިޒް ކުރުމާ އަދި މޮނިޓާކޮށް އިވެލުއޭޓް ކުރުމުގެ ގާނޫނުގައިވާ ގޮތުން، ޕީސީބީގެ ރައީސް އާއި ނައިބު ރައީސައަށް ސިޔާސީ ޕާޓީއެއްގެ މެމްބަރަކަށް އަދި ސިޔާސީ ހަރަކާތެއްގައި ވެސް ނޫޅެވޭނެ އެވެ.