އިންޑިއާ ސަރުކާރުގެ ކުރިއަށް އޮތް މާލީ އަހަރު, ބޭރުގެ ގައުމުތަކަށް ދޭ ހިލޭ އެހީގެ ދަށުން ރާއްޖެއަށް ދޭން ހުށަހެޅި ފައިސާގެ އަދަދު ކުޑަކޮށްފި އެވެ.

ކުރިއަށް އޮތް އަހަރަށް ފާސްކުރަން އިންޑިއާގެ ޕާލަމެންޓަށް ހުށަހެޅި ބަޖެޓުގައި ރާއްޖެއަށް އެހީދޭން 72 މިލިއަން ޑޮލަރު ޖެހި އެވެ. ނަމަވެސް އެ ބަޖެޓް އިއްޔެ ފާސްކުރީ ރާއްޖެއަށް ދޭ އެހީ 48 މިލިއަން ޑޮލަރަށް ކުޑަކޮށްގެންނެވެ.

ކުރިއަށް އޮތް އަހަރަށް އިންޑިއާގެ ބަޖެޓް އިއްޔެ ފާސްކޮށްފައިވާ އިރު މިއަހަރު އެންމެ ގިނަ ހިލޭ އެހީ ދޭނީ ބޫޓާނަށާއި ނޭޕާލަށެވެ. އިންޑިއާ ޕާލިމެންޓަށް ފުރަތަމަ ބަޖެޓް ހުށަހެޅި އިރު ރާއްޖޭއަކީ އިންޑިއާއިން ދެވަނައަށް އެންމެ ގިނަ ހިލޭ އެހީ ދޭން ހަމަޖައްސާފައިވާ ގައުމެވެ. ނަމަވެސް މިހާރު ރާއްޖެ މިވަނީ ތިން ވަނައަށް ވެއްޓިފަ އެވެ.

އިންޑިއާއިން ދޭ ހިލޭ އެހީ ކުޑަކުރިއިރު އެ ގައުމުން ދަނީ ރާއްޖޭގައި ބޮޑެތި މަޝްރޫއުތަކެއް ހިންގަމުންނެވެ. އެގޮތުން ތިލަމާލެ ބުރިޖު މަޝްރޫއު އާއި ހަނިމާދޫ އިންޓަނޭޝަނަލް އެއާޕޯޓުގެ މަޝްރޫއު ފާހަގަކޮށްލެވެ އެވެ.

އިންޑިއާގެ އެހީ މަދުކުރަން ނިންމާފައި މިވަނީ މި ސަރުކާރުން އެ ގައުމާއެކު ބާއްވާ ގުޅުން ރަނގަޅު ކުރުމަށް މަސައްކަތް ކުރަމުން ދަނިކޮށެވެ. ރާއްޖޭއާ އިންޑިއާގެ ގުޅުން ހީނަރުވެ އިންޑިއާގެ ޓޫރިސްޓުން ރާއްޖެ އަންނަ އަދަދު ވެސް ވަނީ ވަރަށް ބޮޑަށް ދައްވެފަ އެވެ.

އިންޑިޔާގެ މީޑިއާއިން ރިޕޯޓުކޮށްފައިވާ ގޮތުގައި އުމްރާނީ ތަރައްޤީގެ އެހީއަށް ދެވޭ މި ބަޖެޓުން ރާއްޖެއަށް މި އަހަރު ދެވޭ އަދަދު ބޮޑުތަނުން ދަށްވެފައިމިވަނީ ރައީސް މުހައްމަދު މުއިއްޒު ގެންގުޅުއްވާ “ޗައިނާ ފަސްޓް” ޕޮލިސީގެ ސަބަބުންނެވެ.

ރާއްޖޭގެ ފޮރިން މިނިސްޓަރު މޫސާ ޒަމީރާއި ސަރުކާރުގެ އިސް ވަފުދެއް މި ހަފްތާގައި ވަނީ ރަސްމީ ދަތުރުފުޅެއްގައި ޗައިނާއަށް ވަޑައިގެންފަ އެވެ. މި ދަތުރުފުޅުގައި އިއްޔެގެ ވަގުތެއްގައި ވަނީ މާލެ އާއި ވިލިމާލެ ސަރަހައްދުގެ މަގުތައް ހެދުމުގެ އެއްބަސް ވުމެއްގައި ޗައިނާގެ ސިޑްކާ އާއެކު ސޮއި ކޮށްފަ އެވެ.