އެމްއެމްޕީއާރުސީގެ ޑެޕިއުޓީ މެނޭޖިން ޑިރެކްޓަރު ކަމުން މުހައްމަދު ބައްސާމު އާދަމް ވަކިވީ ހަރަދު ކުޑަކުރުމަށް ރައީސް ޑރ. މުހައްމަދު މުއިއްޒު ކަނޑައަޅުއްވާފައިވާ ސިޔާސަތުގެ ތެރެއިން ކަމަށް ވިދާޅުވެ އޭނާ ސޯޝަލް މީޑީއާގައި ޕޯސްޓެއް ކުރައްވައިފި އެވެ.

ބައްސާމް އާއި އެ ކުންފުނީގައި އެންމެ ގިނަ ދުވަސްވީ މުވައްޒަފު އިބްރާހިމް އާސިމް ވަނީ ދާދިފަހުން ވަޒީފާއިން ވަކިކޮށްފަ އެވެ. ނަމަވެސް ވަކިކުރި ސަބަބެއް ނުބުނެ އެވެ.

ބައްސާމް "އެކްސް" ގައި ވިދާޅުވީ އޭނާ އެ ކުންފުނީގެ ޑީއެމްޑީކަމުން އިސްތިއުފާ ދިނީ ކަމަށެވެ.

"ރައީސް މުއިއްޒުގެ ޚަރަދު ކުޑަކުރުމުގެ ފިޔަވަޅުތަކަށް ފުރިހަމަ އިހުތިރާމާއެކު އިސްތިއުފާ ދީފިން،" ބައްސާމް ވިދާޅުވި އެވެ.

ބައްސާމް ވިދާޅުވީ އެމްއެމްޕީއާރުސީގައި ހޭދަކުރެއްވި ދުވަސްވަރުގައި މުވައްޒަފުންގެ ދުޅަހެޔޮކަން އިތުރު ކުރުމަށާއި، ޑެސްޓިނޭޝަން މާކެޓިން ކުރިއެރުވުމަށާއި، ބައިނަލްއަގުވާމީ ޕާޓްނަރޝިޕްތައް ކުރިއެރުވުމަށް މަސައްކަތް ކުރެއްވި ކަމަށެވެ.

"ރައީސް މުއިއްޒަށް ހާއްސަ ޝުކުރެއް ދަންނަވަން، ކުންފުނީގެ އެންމެ އުނދަގޫ ދަނޑިވަޅުގައި ކުންފުނި ހިންގުމަށް އަޅުގަނޑަށް އިތުބާރު ކުރެއްވި ކަމަށް ޓަކައި, އަޅުގަނޑު އުންމީދު ކުރަނީ ކުރިއަށް އޮތް ތަނުގައި ވެސް އެއްބާރުލުން ދީ، މި ސިނާއަތުގެ ކުރިއެރުމަށް އެހީތެރިކަން ފޯރުކޮށްދިނުން," ބައްސާމް ވިދާޅުވި އެވެ.