ބޭސްފަރުވާ އަށް އިންޑިއާ އަށް ދާން ވިސާ ހޯދަން އިންޑިއާ ހައިކޮމިޝަންގެ ބޭރުގައި ރޭގަނޑު ދަންވަރުން ފެށިގެން ކިއު ހަދަން ޖެހިއްޖެ އެވެ.

ވިސާ ހޯދަން އެ ހައިކޮމިޝަންގެ ބޭރުގައި ހުރި މީހަކު ބުނީ ހެނދުނު ދޫކުރާ ނަންބަރު ހޯދަން ރޭގަނޑު ދަންވަރުން ފެށިގެން ކިޔޫގައި ތިބެން ޖެހުމަކީ ވަރަށް ބޮޑު އުނދަގުލެއް ކަމަށެވެ. އަދި އިންޑިއާ ސަރުކާރުން ދިވެހިންނަށް މިހާ އުނދަގޫތައް ކުރިމަތިކުރަނީ ސަރުކާރުން އެކަމަށް ހައްލެއް ހޯދައި ނުދޭތީ ކަމަށް ވެސް އެ މީހާ ބުންޏެވެ.

"އަޅުގަނޑުމެން މިހާރު އިންޑިއާއަށް ދާން ކޮންމެ ފަހަރަކު މިޖެހެނީ ވިސާ ނަގަން. މިކަން މިއަށް ވުރެ ފަސޭހަކޮށް ކުރެވޭނެ ގޮތެއް އޮންނަން ވާނެ،" އެތަނުގައި ހުރި މީހަކު ބުންޏެވެ.

ހޮޓެލް ޖެން ކުރިމަތީގައި ހުންނަ އެ ހައިކޮމިޝަންގެ ބޭރުގައި ރޭ ދަންވަރު ވެސް ވިއްސަކަށް މީހުން ކިޔޫގައި މަޑުކޮށްގެން ތިއްބެވެ. އަދި އެމަންޒަރު ފެނިގެން ބައެއް މީހުން ދަނީ ފޮޓޯ ނަގައި، ސޯޝަލް މީޑިއާގައި ވަރަށް ބޮޑަށް ފާޑުކިޔަމުންނެވެ.

ސަރުކާރާއި އިންޑިއާ އާ ދެމެދު އޮންނަ ގުޅުން އިންތިހާއަށް ވަރުގަދަވެ، ރާއްޖޭގެ ކޮންމެ ކަމަކަށް އިންޑިއާގެ ނުފޫޒު އިންތިހާއަށް ފޯރުވަމުންދާ ދަނޑިވަޅެއްގައި، މިފަދަ އިހާނެތި ގޮތަކަށް ދިވެހިންނާ މެދު ކަންތައްތައް ކުރަން ޖެހުމަކީ ސަރުކާރުން ލަދުގަންނަން ޖެހޭ ކަމެއް ކަމަށް ވެސް ބައެއް މީހުން ބުނެފައިވެ އެވެ.

އެކަމާ ގުޅިގެން އާއްމުން ރުޅިގަދަވުމުން އިންޑިއާ ހައި ކޮމިޝަނުން މިއަދު ބުނީ ވިސާ އަށް ފޯމް ހުށަހަޅާ މީހުންނަށް ޓޯކެން ސިސްޓަމްގެ ސަބަބުން ދިމާވެފައިވާ ދަތިތައް އެ ހައި ކޮމިޝަނަށް ފާހަގަ ކުރެވިފައިވާ ކަމަށެވެ. އަދި މެޑިކަލް ވިސާ އަށް ފޯމް ހުށަހަޅާ މީހުންނަށް ޓޯކެން ސިސްޓަމް ސްޓްރީމްލައިންކޮށް ވިސާ ޓޯކެން ސިސްޓަމްގެ ސަބަބުން ދިމާވާ ދަތިތަކަށް ހައްލު ހޯދައި ދިނުމަށް މަސައްކަތް ކުރަމުންދާ ކަމަށް ވެސް ބުންޏެވެ.

އެ ހައިކޮމިޝަނުން ބުނީ އެ މައްސަލައަށް ކުރިއަށް އޮތް ދެ ތިން ދުވަހުގެ ތެރޭގައި ހައްލެއް ލިބޭނެ ކަމަށެވެ.

އިންޑިއާ ހައިކޮމިޝަނުން ބުނީ ކޮވިޑް-19 ގެ ބަލިމަޑުކަން ދުނިޔޭގައި ފެތުރެން ފެށުމާއެކު އިންޑިއާގެ ބޯޑަރުތައް ބަންދުކުރި ކަމަށާއި އެކަމަކު، އިންޑިއާ އާއި ރާއްޖޭގެ ދެމެދު އޮންނަ ގާތް ގުޅުމުގެ ސަބަބުން މިދިޔަ އަހަރުގެ ޖޫން މަހުން ފެށިގެން ދިވެހިންނަށް އިންޑިއާ އަށް ބޭސްފަރުވާ އަށް ދިއުމުގެ ފުރުސަތު ހުޅުވާލި ކަމަށެވެ. އެގޮތުން މިހާތަނަށް 5،000 މެޑިކަލް ވިސާ ދޫކޮށްފައިވާ އިރު، މި އަހަރު އެކަނި ވެސް 2،000 މެޑިކަލް ވިސާ ދޫކުރި ކަމަށް ވެސް އެ ހައިކޮމިޝަނުން ބުންޏެވެ.

"ވިސާއަށް ފޯމް ހުށައަޅުއްވާ ފަރާތްތަކަށް ކުރިމަތިވެފައިވާ ދަތިތަކާއިމެދު ހިތާމަކުރާހާލު، ވީ އެންމެއަވަހަކަށް މި މައްސަލައަށް ސްޓްރީމްލައިން ހައްލެއް ފޯރުކޮށްދެވޭނެކަމުގެ ޔަގީންކަން އަރުވަމެވެ،" އިންޑިއާގެ ހައި ކޮމިޝަނުގެ ބަޔާނުގައި ބުނެފައިވެ އެވެ.