ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް ބައްސާމް އަދީލް ޖަލީލް ނުވަ މަސް ދުވަހަކަށް ދުނިޔޭގެ ފުޓުބޯޅައިގެ މައި އިދާރާ، ފީފާ އިން ސަސްޕެންޑުކޮށްފި އެވެ.

ފިފާއިން މިރޭ ނެރުނު ބަޔާނެއްގައި ބުނެފައި ވަނީ އެ އިދާރާގެ އިންވެސްޓިގޭޓަރީ ޗެމްބަރުން އެ ނިންމުން ނިންމީ ދިވެހި ސަރުކާރުގެ ކަމާބެހޭ އިދާރާތަކުން ބައްސާމްގެ ކޮރަޕްޝަންގެ މައްސަލަތަކެއް ތަހުގީގު ކުރަމުން އަންނާތީ ކަމަށެވެ.

ކޯޓު އަމުރެއްގެ ދަށުން މިދިޔަ އޮކްޓޫބަރު މަހުގެ 22 ވަނަ ދުވަހު ފުލުހުން އެފްއޭއެމްގެ އިދާރާ ބަލައި ފާސްކުރިއިރު، އެފްއޭއެމްއަށް ލިބޭ ފައިސާ ނަހަމަގޮތުގައި ބޭނުންކޮށްފައިވާ ކަމުގެ ހެކި ލިބިފައިވާ ކަމަށް ފުލުހުން މީގެކުރިން ބުނެފައިވެ އެވެ.

ފީފާގެ ފީފާގެ އިންވެސްޓިގޭޓަރީ ޗެމްބަރުން ހޯދި ހޯދުންތަކުން އެނގުނު ގޮތުގައި އެފްއޭއެމްއަށް ލިބޭ ފައިސާ ބޭނުންކޮށްފައިވާކަން އެނގެން އޮންނަ ކަމަށް ފީފާގެ ބަޔާނުގައިވެ އެވެ.

ބައްސާމް ސަސްޕެންޑުކުރިކަން މިއަދު އޭނާއަށް އަންގާފައިވާނެ ކަމަށް ވެސް ފީފާ އިން ބުންޏެވެ.

އެފްއޭއެމްގެ ރައީސް ކަމުގައި ބައްސާމް މިހާރު ހުންނެވީ ދެވަނަ ދައުރަކަށެވެ. އޭނާގެ ރައީސް ކަމުގެ ދައުރު އަންނަ މަހުގެ ދެ ވަނަ ދުވަހަށް ހަމަވާނެ އެވެ.