ކައުންސިލްތަކުގެ އިދާރީ މުވައްޒަފުންގެ މުސާރަ ބޮޑުކުރުމުގެ މަސައްކަތް ނޭޝަނަލް ޕޭ ކޮމިޝަނުން ފަށައިފި އެވެ.

ޕީއެސްއެމްއަށް ދެއްވި އިންޓަވިއުއެއްގައި ލޯކަލް ގަމާވެމެންޓް މިނިސްޓަރު އާދަމް ޝަރީފް ވިދާޅުވީ ކައުންސިލްތަކުގެ ދަރަޖަ 3 އިން 4 އަށް ބަދަލުކޮށްފައިވާ ކަމަށެވެ. އަދި އެ ބަދަލާއެކު މުވައްޒަފުންގެ މުސާރައަށް ވެސް ބަދަލުތަކެއް އަންނާނެ ކަމަށާއި އެ މަސައްކަތް ޕޭ ކޮމިޝަނުން ކުރަމުން އަންނަ ކަމަށް އޭނާ ވިދާޅުވި އެވެ.

"ދަރަޖަ ބަދަލުވުމާއެކު، ޕޭ ކޮމިޝަނުން ގެންނަން ކަނޑައަޅާ ބަދަލުތައް ސަރުކާރުކާރަށް ހުށަހެޅުމަށް ދަނީ ތައްޔާރުވަމުން. ޢީދު ހަފްތާ ނިމުނީމަ ވުޒާރާއިން ޕޭ ކޮމިޝަނާ ބައްދަލުކޮށް، އެބޭފުޅުން ސަރުކާރަށް ހުށައަޅާ ކަންކަމާ ގުޅޭގޮތުން މަޝްވަރާކުރާނަން. ކައުންސިލްތަކަށް ކުރިއެރުންތައް ލިބޭނެކަން ކަށަވަރުކުރާނަން،" އާދަމް ޝަރީފް ވިދާޅުވި އެވެ.

ކައުންސިލްތައް ހިންގަނީ އިދާރީ މުވައްޒަފުން ކަމަށާއި ނަމަވެސް މިހާތަނަށް އިދާރީ މުވައްޒަފުންނަށް މާބޮޑު އަހަންމިއްޔަތުކަމެއް ނުދެވޭ ކަމަށެވެ.

އާދަމް ޝަރީފް މިފަދައިން ވިދާޅުވިޔަސް ކައުންސިލްތަކުގެ އިދާރީ މުވައްޒަފުން ހިމެނޭހެން ސަރުކާރުގެ ހުރިހާ މުވައްޒަފުންނަށް މި އަހަރުގެ ޖެނުއަރީ އެކަކުން ފެށިގެން ބޮޑު މުސާރަ ދިނުމަށް ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން ނިންމި އެވެ. އަދި އެކަމަށް ބޭނުންވާ ފައިސާ ބަޖެޓްގައި ވެސް ޖެހި އެވެ. ނަމަވެސް ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެން ބޮޑު މުސާރަ ދިނުން ފަސްކުރީ އެވެ.