ފަލަސްތީނަށް އެހީވާ އދ. ގެ ފަންޑަށް ރާއްޖެ އިން ދޭ އެހީ 50،000 ޑޮލަރަށް އިތުރު ކުރަން ރައީސް ޑރ. މުހައްމަދު މުއިއްޒު ނިންމާފައިވާ ކަމަށް ފޮރިން މިނިސްޓަރު މޫސާ ޒަަމީރު މިއަދު ވިދާޅުވެއްޖެ އެވެ.

ޔުނައިނެޑް ނޭޝަންސް ރިލީފް އެންޑް ވޯކްސް އެޖެންސީ ފޯ ފަލަސްތީން ރެފިއުޖީސް (އަންރުވާ) އަށް ރާއްޖެ އިން މީގެކުރިން ދެމުން އައީ 5000 ޑޮލަރެވެ. އެކަމަކު، މި ސަރުކާރުން ވަނީ އެ އަދަދު ބޮޑު ކުރަން ނިންމައިފަ އެވެ.

"ފަލަސްތީނާ އެކު ދިވެހީން" ނަމުގައި ރައީސް މުއިއްޒުގެ އިސްނެންގެވުމަކަށް ދައުލަތުގެ މީޑިއާ ޕީއެސްއެމުން އިންތިޒާމުކޮށްގެން ފެށި ޓެލެތޯންގައި ވާހަކަ ދައްކަވަމުން ޒަމީރު ވިދާޅުވީ ފަލަސްތީނު ފަންޑަށް ދެމުން އަންނަ އެހީ 10 ގުނަ އިތުރު ކުރަން ސަރުކާރުން ނިންމާފައިވާ ކަމަށެވެ.

"މިދިޔަ އަހަރުތަކުގައި ދައުލަތުން ވާނީ މި ފަންޑަށް އަބަދުވެސް އެހީވެދީފައި. އެގޮތުން ކޮންމެ އަހަރަކު ރަމްޒީ އެހީގެ ގޮތުގައި 5،000 ޑޮލަރު ޑޮލަރު ދަނީ ދެމުން. އެކަމަކު މިދިޔަ އަހަރުގެ އޮކްޓޫބަރު 7 ގެ ފަހުން އިޒްރޭލުން ދެމުންގެންދާ ހަމަލާތަކުގެ ސަބަބުން ފަލަސްތީނަށް ވެފައިވާ އެހީގެ ގޮތުން ރައީސް ވަނީ މި އަހަރު މި ފަންޑަށް 50،000 ޑޮލަރު. އެއީ ކުރިން ދެމުން އައި އަދަދުގެ 10 ގުނަ ހަދިޔާ ކުރާ ގޮތަށް ނިންމަވާފައި،" ޒަމީރު ވިދާޅުވި އެވެ.

މި ޓެލެތޯންއިން ލިބޭ ފައިސާ އަންރުވާ އާ ހަވާލު ކުރާނީ މާލީ ވުޒާރާ އާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ)އާ މެދުވެރިކޮށް، ހާރިޖީ ވުޒާރާގެ ބެލުމުގެ ދަށުން ކަަމަށް އޭނާ ވިދާޅުވި އެވެ.

މި ފައިސާ ހަމައަށް ރައްދު ކުރެވޭތޯ ބެލުމަށްޓަކައި އިންޑިޕެންޑެންޓް އޮޑިޓަރެއް ވަނީ ހަމަޖައްސައިފަ އެވެ. އެއީ ކްރޯވް މޯލްޑިވްސް އެލްއެލްޕީ ނަމަކަށް ކިޔާ ކުންފުންޏެކެވެ.