ފަލަސްތީނުގެ ރައްޔިތުންގެ ހައްގުގައި ކުރާ މަސައްކަތް އިތުރު ހަރުފަތަކަށް ގެންދަން ޖެހޭ ކަމުގައި ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ރައީސް ޑރ. މުއިއްޒު މިގޮތަށް ވިދާޅުވީ "ފަލަސްތީނާއެކު ދިވެހިން" ނަމުގައި ޕީއެސްއެމުން އިންތިޒާމުކޮށްގެން ބައެއް މީޑިއާތަކާއި ސަރުކާރުގެ ވުޒާރާތަކާއި ކުންފުނިތައް ގުޅިގެން ކުރިއަށްގެންދާ ޓެލެތޯން ފެށުމުގެ ރަސްމިއްޔާތުގައެވެ.

ރައީސް ޑރ. މުއިއްޒު ވިދާޅުވީ ދިވެހިންނަކީ ފެށުނީއްސުރެ ފަލަސްތީނުގެ ރައްޔިތުންނާއެކު ތިބި ބައެއް ކަމަށާއި ދިވެހިން އެކި ގޮތް ގޮތަށް އެހީތެރިވަމުންދާ ކަމަށެވެ. އަދި ފަލަސްތީނުގެ ހައްގުގައި ދިވެހިންގެ އަޑު އިއްވެން އޮތް ގޮތަކަށް އިއްވަމުން ގެންދާ ކަމަށް ރައީސް ވިދާޅުވި އެވެ.

"ނަމަވެސް އެ މަސައްކަތް އެއަށްވުރެ މަތީ ފަންތީއަކަށް ގެންދަން އެބަ ޖެހޭ، މިހާރު ދުނިޔޭގައި މީގެކުރިން ފަލަސްތީނާ އެއްކޮށް ވާހަކަ ނުދައްކާ ތިބި ފަރާތްތަކުން ވެސް ފަލަސްތީނުގެ ރައްޔިތުންގެ ހައްގުގައި ތެދުވެ، މަސައްކަތް ކުރާ ތަން ފެނޭ. އެއީ ލިބޭ ވަރަށް ބޮޑު ހިތްވަރެއް،" ރައީސް ވިދާޅުވި އެވެ.

ރައީސް ވިދާޅުވި ގޮތުގައި މިއީ ދެ ގައުމެއްގެ ދޭތެރޭގައި ޖެހިފައި އޮތް މައްސަލައެއް ނޫނެވެ. ރައީސް ވިދާޅުވީ، މިއީ އިސްލާމީ އުއްމަތަށް ކުރިމަތިވެފައި އޮތް ބޮޑު ކަމެއް ކަމަށެވެ. ދިވެހިންނަކީ މުސްލިމުން ކަމަށްވާ އިރު، މުސްލިމުންގެ ސިފައަކީ އެއް މުސްލިމަކަށް ދިމާވާ ކޮންމެ ކަމެއްގައި މުޅި އުއްމަތް ޝާމިލްވުން ކަމަށް ވިދާޅުވި އެވެ.

"އެއީ ދީނުގައި އެކަން އޮތް ގޮތް، ހަށިގަނޑުގެ އެންމެ ކުޑަތަންކޮޅަކަށް ތަދުވިޔަސް މުޅި ހަށިގަނޑު އެކަމުގައި ވޭން އަޅާާނެކަން މިސާލެއްގެ ގޮތުގައި އަޅުގަނޑުމެންނަށް އިސްލާމް ދީނުގައި ދަސްކޮށްދީފައި އޮންނަނީ، އެއީ މުސްލިމުންގެ އުއްމަތުގެ ސިފައަކީ،". ރައީސް ވިދާޅުވި އެވެ.

ރައީސް ވިދާޅުވީ، މިއީ ފަލަސްތީނާއި އިސްރާއީލާ ދެމެދު އޮތް މައްސަލައެއް ކަމަށް ބަލައި ލޯ މަރާލައިގެން ތިބެގެން ނުވާނެ ކަމަށާއި، މިއީ ކޮންމެ މުސްލިމެއްގެވެސް ހައްގެއް، ޒިންމާއެއް އަދި މަސްއޫލިއްޔަތެއްގެ ގޮތުގައި ބަލަން ޖެހޭ ކަމަށެވެ.

ރައީސް ވިދާޅުވީ، ކޮންމެ ދިމާލެއްގައި، ކޮންމެ ޕާޓީއެއްގައި ހުއްޓަސް، ކޮންމެ ވިސްނުމެއްގައި ހުއްޓަސް މިއީ އެކައްޗެއް ކިޔާ ކަމެއް ކަމަށާއި، އެހެންކަމުން ހުރިހާ ރައްޔިތުން ނުކުމެ މި ޓެލެތޯންގައި ބައިވެރިވެވަޑައިގަތުމަށް އެދިވަޑައިގަންނަވާ ކަމަށެވެ.

"މުއްސަނދިން ވިޔަފާރިވެރިންވެސް އަދި އެންމެ އާދައިގެ މީހާވެސް އެ ފަރާތަކަށް ކޮށްދެވެން އޮތް އެހީއެއް ކޮށްދިނުމަކީ އަޅުގަނޑު އެދޭ އެދުމެއް،". ރައީސް ވިދާޅުވި އެވެ.