ހަތަރެސްފައި އާދަޔާޚިލާފަށް ފިނިވާނަމަ ސަމާލުވޭ!
އެންޖެލީނާ ފަންޑިތަ ހަދާ ކަމަށް ބުނެފި
ނަތަންޔަހޫ ހައްޔަރުކުރަން އައިސީސީން އަމުރެއް ނެރެފި
ވިހި ވަނަ ރައްޔިތުންގެ މަޖިލީހުގެ ދާއިމީ ކޮމިޓީތަކަށް މެންބަރުން ކަނޑައަޅައިފި އެވެ.
މިއަދު ކުރިއަށްދިޔަ 20 ވަނަ ރައްޔިތުންގެ މަޖިލީހުގެ ދެވަނަ ޖަލްސާގައި މަޖިލީހުގެ ކޮމިޓީތައް އެކުލަވައިލާނެ ގޮތް ވަނީ ފާސް ކޮށްފަ އެވެ. މަޖިލީހުން ފާސްކޮށްފއި ވަނީ ވެރިކަންކުރާ ޕީއެންސީގެ ފަރާތުން މަޖިލީހުގެ މެޖޯރިޓީ ލީޑަރު އިނގުރައިދޫ ދާއިރާގެ މެންބަރު އިބްރާހީމް ފަލާހު ހުށަހަޅުއްވާފައިވާ ގޮތަށް މަޖިލީހުގެ ކޮމިޓީތައް އެކުލަވައިލުމަށެވެ.
ފަލާހު ހުށަހެޅުއްވީ މަޖިލީހުގެ ދާއިމީ ކޮމިޓީތަކުގެ ތެރެއިން ގާނޫނުއަސާސީގެ 241 ވަނަ މާއްދާގެ ދަށުން އެކުލަވައިލާ ސަލާމަތީ ޚިދުމަތްތަކާ ބެހޭ ކޮމިޓީގެ މެންބަރުންގެ އަދަދަކީ 13 ކަމަށް ކަނޑައެޅުމާއެކު، މަޖިލީހުގެ ގަވާއިދުގެ ދަށުން އެކުލަވައިލާ އެހެނިހެން ދާއިމީ ކޮމިޓީތަކުގެ މެންބަރުންގެ އަދަދަކީ 11 މެންބަރުންކަމަށް ހަމަޖެއްސުމަށެވެ.
ފަލާހު ހުށަހެޅި ގޮތަށް ފާސްވީ 88 މެންބަރުންގެ އަޣުލަބިއްޔަތުންނެވެ.
މަޖިލީހުގައި މިވަގުތު ތިއްބަވަނީ ޕީއެންސީގެ 75 މެންބަރުންނާއި އެމްޑީޕީގެ 12 މެންބަރުންނާއި އެމްޑީއޭގެ ދެ މެންބަރުންގެ އިތުރުން ޖުމްހޫރީ ޕާޓީގެ މެންބަރަކާއި އެމްއެންޕީގެ މެންބަރަކާއި ވަކި ޕާޓީއަކަށް ނިސްބަތްވެވަޑައިނުގަންނަވާ ދެ މެންބަރުންނެވެ. ކޮމިޓީތަކަށް ސްލޮޓުތައް ކަނޑައެޅުމުގައި ބަލާފައިވަނީ މަޖިލީހުގައި ޕާޓީތަކުން މެންބަރުން ތަމްސީލް ކުރައްވާ އަދަދަށެވެ.
މަޖިލީހުން ފާސްކޮށްފައިވާ ރިޕޯޓުގައިވާ ގޮތުން ދާއިމީ ކޮމިޓީތަކުގައި ޕީއެންސީއަށް 151 ސްލޮޓު ލިބެ އެވެ. އަދި އެމްޑީޕީއަށް 24 ސްލޮޓް ލިބޭއިރު އެމްޑީއޭއަށް ހަތަރު، ޖުމްހޫރީ ޕާޓީއަށް ދޭއް، އެމްއެންޕީއަށް ދޭއް އަދި ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރުންނަށް ހަތަރު ސްލޮޓް ލިބެ އެވެ. ސަލާމަތީ ހިދުމަތްތަކާބެހޭ ކޮމިޓީ ފިޔަވައި ދާއިމީ 17 ކޮމިޓީގައި ހިމެނިވަޑައިގަންނަވާނީ ކޮންމެ ކޮމިޓީއެއްގައި 11 މެންބަރުންނެވެ.
މީގެ އިތުރުން ސަލާމަތީ ހިދުމަތްތަކާ ބެހޭ ކޮމިޓީގައި ހުރިހާ ސިޔާސީ ޕާޓީއެއްގެ މެންބަރުން ހިމެނިވަޑައިގަންނަވާނެހެން ޖުމްލަ 13 މެންބަރުން ތިއްބަވާނެ އެވެ. އެއީ ޕީއެންސީގެ އަށް މެންބަރުންނާއި އެމްޑީޕީ، އެމްޑީއޭ، ޖުމްހޫރީ ޕާޓީ އަދި އެމްއެންޕީގެ ތެރެއިން ކޮންމެ ޕާޓީއަކުން މެންބަރަކާއި ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރެކެވެ.
މުހިންމު ބައެއް ކޮމިޓީތަކަށް މެންބަރުން ކަނޑައަޅާފައިވާ ގޮތް:
- ސަރުކާރު މަސްއޫލިއްޔަތު އަދާކުރާ މިންވަރު ބަލާ ކޮމިޓީ - ޖުމްލަ 11 މެންބަރުން ތިއްބަވާ އެ ކޮމިޓީގައި ޕީއެންސީގެ އަށް މެންބަރުން، އެމްޑީޕީގެ ދ3 މެންބަރު އަދި އެމްޑިއޭގެ އެއް މެންބަރަކު ހިމެނޭ
- ޖުޑީޝަރީ ކޮމިޓީ - ޖުމްލަ 11 މެންބަރުން ތިއްބަވާ އެ ކޮމިޓީގައި ޕީއެންސީގެ ނުވަ މެންބަރުން އަދި އެމްޑީޕީގެ ދެ މެންބަރުން ހިމެނޭ
- މިނިވަން މުއައްސަސާ ކޮމިޓީ - ޖުމްލަ 11 މެންބަރުން ތިއްބަވާ އެ ކޮމިޓީގައި ޕީއެންސީގެ ނުވަ މެންބަރުން އަދި އެމްޑީޕީ އާއި އެމްއެންޕީގެ އެއް މެންބަރުން
- އިގްތިސާދީ ކޮމިޓީ - ޖުމްލަ 11 މެންބަރުން ތިއްބަވާ އެ ކޮމިޓީގައި ޕީއެންސީގެ ހަތް މެންބަރުން، އެމްޑީޕީގެ ތިން މެންބަރު އަދި އެމްޑީއޭގެ މެންބަރަކު ހިމެނޭ
- މާލިއްޔަތު ކޮމިޓީ - ޖުމްލަ 11 މެންބަރުން ތިއްބަވާ އެ ކޮމިޓީގައި ޕީއެންސީގެ އަށް މެންބަރުން، އެމްޑީޕީގެ ދެ މެންބަރުން އަދި ޖުމްހޫރީ ޕާޓީގެ މެންބަރަކު ހިމެނޭ
- އެސްއޯއީ ކޮމިޓީގައި - ޖުމްލަ 11 މެންބަރުން ތިއްބަވާ އެ ކޮމިޓީގައި ޕީއެންސީގެ އަށް މެންބަރުން، އެމްޑީޕީގެ ދެ މެންބަރުން އަދި އެމްއެންޕީގެ އެއް މެންބަރަކު ހިމެނޭ
