އާރްޓީއެލް ހިދުމަތް ދިނުމުގައި ދަތުރުފަތުރުގެ ގޮތުން މާލެއާ ދުރުގައި ހުރި ބައެއް ރަށްރަށަށް އިސްކަން ނުދޭތީ ކިނބިދޫ ދާއިރާގެ މެންބަރު އަލީ އަޝްރަގް ކަންބޮޑުވުން ފާޅުކުރައްވައިފި އެވެ.

ފޭސްބުކުގައި ކުރެއްވި ޕޯސްޓެއްގައި އަޝްރަގް ވިދާޅުވީ ތ. އަތޮޅަކީ ދަތުރުފަތުރުގެ ގޮތުން ވެރިރަށް މާލެ އާ އެންމެ ދުރުގައިވާ އެއް އަތޮޅު ކަމަށްވާއިރު، އާރްޓީއެލްގެ ހިދުމަތް އެ އަތޮޅަށް ފެށުން ލަސްވާތީ ކަންބޮޑުވާ ކަމަށެވެ.

އޭނާ ވިދާޅުވީ އެކަން ސަރުކާރުގެ ކަމާބެހޭ ފަރާތްތަކުގެ ސަމާލުކަމަށް ގެނެސް އަވަސް ހައްލެއް ހޯދުމުގެ މަސައްކަތް ފެށިފައިވާ ކަމަށެވެ.

އަޝްރަގް ވިދާޅުވީ އެކަމާ ގުޅިގެން އެމްޓީސީސީއާ ބައްދަލުކޮށް ތ. އަތޮޅު ރައްޔިތުންގެ ކަންބޮޑުވުންތައް ހިއްސާކޮށްފައިވާނެ ކަމަށެވެ. އަދި ވަރަށް އަވަހަށް ޓްރާންސްޕޯޓް މިނިސްޓްރީއާއެކު އެކަމުގެ މަޝްވަރާ ކުރިއަށްގެންދަވާނެ ކަމަށް އޭނާ ވިދާޅުވި އެވެ.

"އަޅުގަނޑުގެ އުންމީދަކީ މި ކަމަށް އަވަސް މުސްތަގުބަލެއްގައި ހައްލެއް ލިބިގެން ދިޔުން،" އަޝްރަގް ވިދާޅުވި އެވެ.

އާރްޓީއެލް ފެރީގެ ހިދުމަތަކީ ރާއްޖޭގެ ރަށްތައް ދަތުރުފަތުރުގެ ނިޒާމަކުން ގުޅާލުމަށް އެމްޑީޕީން ވެފައިވާ ވައުދު ފުއްދުމުގެ ގޮތުން ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން ފެށި މަޝްރޫއެކެވެ. އެ މަޝްރޫއުގެ ދަށުން ފެރީގެ ހިދުމަތް އެންމެ ފުރަތަމަ ފެށީ އުތުރުގެ އަތޮޅުތަކުގަ އެވެ. އެއަށްފަހު އެ ހިދުމަތް ފެށީ ދެކުނުގެ އަތޮޅުތަކުގަ އެވެ. އަދި މެދުރާއްޖެތެރޭގެ ބައެއް އަތޮޅުތަކުގައި ވެސް އެ ހިދުމަތް އަންނަނީ ދެމުންނެވެ.

އަވަސް މުއްދަތެއްގެ ތެރޭގައި ނ، ރ އަދި ބ އަތޮޅުގައި އާރްޓީއެލްގެ ހިދުމަތް ފަށާނެ ކަމަށް ސަރުކާރުން ވަނީ ބުނެފަ އެވެ.