ދިވެހިބަހުން ވާހަކަދައްކަން ނޭނގޭ ކަމަށް ކްރިމިނަލް ކޯޓުގައި ބުނި ދިވެއްސަކަށް ތަރުޖަމާނަކު ހޯދުމަށް ޝަރީއަތުން ފުރުސަތު ދީފިއެވެ.

ކްރިމިނަލް ކޯޓުގެ އަމުރުގައިވާ ގޮތުން މި ދިވެއްސަކީ 39 އަހަރުގެ މ. ފެންވިނަ، ހަސަން އަޖުއާން އެވެ.

އަޖުއާން ހައްޔަރު ކޮށްފައިވަނީ ބިރު ދެއްކުމާއި މުދަލަށް ގެއްލުން ދިނުމުގެ މައްސަލައެއްގަ އެވެ. އޭނާގެ މައްޗަށް ކްރިމިނަލް ކޯޓުން ވަނީ އެއް ދުވަހަށް ބަންދުގައި ބަހައްޓަން ހުކުމް ކޮށްފައެވެ. އޭނާގެ މައްޗަށް ބަންދު އަމުރުކުރިއިރު، އޭނާއަކީ ދިވެހި ބަހުން ވާހަކަދައްކަން ނޭނގޭ މީހެއް ކަމަށް ވަނީ ބުނެފަ އެވެ. އެހެންކަމުން ޝަރީއަތުން ވަނީ އޭނާއަށް ތަރުޖަމާނެއް ހޯދުމުގެ ފުރުސަތު ވެސް ދީފަ އެވެ.

ކްރިމިނަލް ކޯޓުން އޭނާ ބަންދުގައި ބަހައްޓަން އަމުރުކޮށްފައި ވަނީ މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމުގެ ބިރަށްޓަކަ އެވެ. ޖިނާއި އިޖުރާތުގެ ގާނޫނުގެ 60 ވަނަ މާއްދާގެ ދަށުން މީހަކު ހެކި ފޮރުވަން މަސައްކަތްކޮށްފާނެ ކަމަށް ނުވަތަ ކޯޓަށް ހާޒިރުނުވެ ފިލާފާނެ ކަމަށް ބެލެވޭ ނަމަވެސް މީހަކު ބަންދުގައި ބެހެއްޓިދާނެ އެވެ.