ހަތާވީސް އަހަރު ފަހުން ބޮލީވުޑްގެ މަޝްހޫރު އެކްޓަރު ސުނިލް ޝެޓީ އާއި މަޝްހޫރު ބަތަލާ ޕޫޖާ ބަޓް އެކުގައި ފިލްމެއްގެ މަސައްކަތް ފެށުމަށް ތައްޔާރުވެއްޖެ އެވެ.

ޕޫޖާ އާއި ސުނިލް ޝެޓީ އެކުގައި ފެނިގެންދިޔަ ފިލްމަކީ 1997 ވަނަ އަހަރު ރިލީޒްކުރި "ބޯޑާ" އެވެ. މިފިލްމަކީ ގިނަ ބައެއްގެ މެދުގައި މަގުބޫލު ފިލްމެކެވެ.

މީޑިއާ ރިޕޯޓްތައް ބުނާ ގޮތުގައި ސުނިލް އާއި ޕޫޖާ އެކުގައި ފެނިގެންދާ މިފިލްމަކީ ކްރައިމް ތްރިލާ ފިލްމެކެވެ. މިފިލްމުގައި ޕޫޖާ ފެނިގެންދާނީ "އަޔަން ލޭޑީ" ކެރެކްޓަރު ރޯލަކުންނެވެ. އެހެން ނަމަވެސް ސުނީލް ޝެޓީގެ ކެރެކްޓަރާ ބެހޭ ތަފްސީލެއް އަދި ހާމަކޮށްފައެއް ނުވެ އެވެ.

މިފިލްމު ރިލީޒްކުރާނެ ތާރީހެއް އަދި އިއުލާނެއް ނުކުރެ އެވެ.

https://www.instagram.com/p/C6xrsW9tqWt/?utm_source=ig_embed&ig_rid=4d8fbe32-6b98-47df-a2af-a50c8fe49215

ޕޫޖާއަކީ މީގެ ތެރެއިން ވެސް ޚާއްސަކޮށްލެވޭ އެކްޓަރެކެވެ. ޕޫޖާ އަކީ 1990 ގެ އަހަރުތަކުގައި ބޮލީވުޑްގައި ވަރަށް ގަދަޔަށް ވިދާލި ބަތަލާ އެކެވެ. އޭނާ ބޮޑަށް މަޝްހޫރުވެގެން ދިޔައީ އޭނާގެ ރީތިކަމަށް ވުރެ އެކްޓްކުރުމުގެ ހުނަރުންނެވެ.

އެކްޓްކުރުމުގެ އިތުރުން ޑައިރެކްޝަންގެ މަސައްކަތް ވެސް ޕޫޖާ ކޮންމެވެސް ވަރަކަށް ދަނީ ކުރަމުންނެވެ.

ޕޫޖާގެ ބައްޕަ އަދި މަޝްހޫރު ފިލްމު ޑައިރެކްޓަރު މަހޭޝް ބަޓްގެ "ޑެޑީ"އިން 1989 ގައި އޭނާ ފިލްމީ ދުނިޔެއަށް ނުކުތްއިރު އުމުރުން އެންމެ 17 އަހަރެވެ. އޭގެ ފަހުން 2001 އާ ހަމައަށް ގިނަ ފިލްމުތަކެއް ޕޫޖާ ކުޅެފައިވެ އެވެ. އަދި އެންމެ ފަހުން އޭނަ ފެނުނީ ފިލްމު ޕްރޮޑިއުސްކުރުމާއި ޑައިރެކްޓްކުރުމުގައި އުޅެނިކޮށެވެ. އެގޮތުން "ޕާޕް" (2004)، "ހޮލިޑޭ" (2006)، "ދޯކާ" (2007)، "ކަޖްރާރޭ" (2010)، އަދި "ޖިސްމް 2" އަކީ ޕޫޖާ ޑައިރެކްޓްކުރި ފިލްމުތަކެވެ. އަދި މިހާރު ވެސް "ކެބެރޭ" އާއި "ޖިސްމް 3" ޑައިރެކްޓްކުރުމުގެ މަސައްކަތް ޕޫޖާ ދަނީ ކުރަމުންނެވެ.

ޕޫޖާ ބަޓް އެންމެ ފަހުން ފެނިގެން ގޮސްފައިވަނީ "ބޮމްބޭ ބެގަމްސް" އާއި "ބިގް ގާލްސް ޑޯންޓް ކްރައީ" ފަދަ ސީރީޒްތަކުންނެވެ. އަދި ޕޫޖާ ވަނީ "ބިގް ބޮސް އޯޓީޓީ 2" ގައި ވެސް ފެނިފަ އެވެ.

ސުނީލް ޝެޓީ މިހާރު އަންނަނީ "ޑާންސް ދީވާނޭ" ރިއަލިޓީ ޝޯގެ ޖަޖެއް ގޮތުގައި ހަރަކާތެރިވަމުންނެވެ. އޭނާ އެންމެ ފަހުން މަސައްކަތްކުރީ "ހަންޓަރ- ޓޫޓޭގާ ނާހީ ޓޯޑޭގާ" ވެބް ސީރީސްގަ އެވެ. އޭގައި ސުނީލް ކުޅެފައިވަނީ އޭސީޕީގެ ރޯލެވެ. މި ސީރީސްގައި އީޝާ ދިއޯލް ވެސް ފެނިގެންދިޔަ އެވެ.