ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ގާއިމްކުރި ކިންގް ސަލްމާން މިސްކިތް ރަސްމީކޮށް ހުޅުވަން ސަރުކާރުން ނިންމައިފި އެވެ.

އެ މިސްކިތް ރަސްމީކޮށް ހުޅުވަން ނިންމާފައިވާއިރު، 2022 ވަނަ އަހަރުގެ އޭޕްރީލް މަހުން ފެށިގެން އެ މިސްކިތް އަންނަނީ ބޭނުންކުރަމުންނެވެ.

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ސައުދި އަރަބިއްޔާއަށް ކުރެއްވި ދަތުރުފުޅަށް ފަހު ދައުލަތުގެ މިޑިއާއަށް ވިދާޅުވީ، މި އަހަރުގެ ހައްޖުގެ ފަހުން ކިންގް ސަލްމާން ސެންޓަރު ރަސްމީކޮށް ހުޅުވުމުގެ ކަންތައް ކުރިއަށް ގެންދެވޭތޯ މަޝްވަރާ ކޮށްފައިވާނެ ކަމަށެވެ.

"އަޅުގަނޑުމެން މަސައްކަތް ކުރަމުން މިދަނީ ﷲ އިރާދަކުރެއްވިއްޔާމުން މި އަހަރުގެ ހައްޖުގެ ފަހުން ކިންގ ސަލްމާން ސެންޓަރު ރަސްމީކޮށް ހުޅުވުމުގެ ކަންތައްތައް ކުރިއަށް ގެންދެވޭތޯ، އަދި ކިންގ ސަލްމާން ސެންޓަރު ހުޅުވުމަށްޓަކައި ހަރަމްފުޅުގެ ކޮންމެވެސް އިމާމެއް ރާއްޖެ ވަޑައިގަންނަވާނެތޯ އަޅުގަނޑުމެން ވާނެ މަޝްވަރާކޮށްފައި، އިރާދަކުރެއްވިއްޔާ އެކަން އެގޮތަށް ވާނެ ކަމަށް އަޅުގަނޑުމެން އުއްމީދު ކުރަމުން މި ދަނީ.". ޝަހީމް ވިދާޅުވި އެވެ.

ސަލްމާން މިސްކިތް އިމާރާތް ކޮށްފައި ވަނީ ތުރުކީގެ ޓާމެކްސް ކުންފުނިންނެވެ. ސަރުކާރުން އެ ކުންފުންޏާއެކު އެއްބަސްވުމުގައި ސޮއިކުރީ ފެބްރުއަރީ 28، 2017 ގަ އެވެ. މި ކުންފުނިން ރާއްޖޭގައި ހިންގި އެންމެ ބޮޑު މަޝްރޫއަކީ ހުޅުމާލެ ޓްރީޓޮޕް ހޮސްޕިޓަލުގެ މަޝްރޫއު އެވެ.

މިސްކިތުގެ މަޝްރޫއަށް 24.95 މިލިއަން ޑޮލަރު ހަރަދުވާނެ ކަމަށް ސަރުކާރުން ކުރިން ބުނެފައިވެ އެވެ