ގއ. ވިލިނގިލީގެ އުމުރުން 13 އަހަރުގެ ހާލު ދެރަ ކުއްޖަކު އިތުރު ފަރުވާއަށް މާލެ ގެނައުމުގައި ލަސްތަކެއްވެ، އެންމެފަހުން އެ ކުއްޖާ މާލެ ގެނެސް ފަރުވާދެމުން ދަނިކޮށް މަރުވި މައްސަލައިގައި ދިވެހި ސަރުކާރުގެ ވެރިން މާފަށް އެދުމަށް އެމްޑީޕީން ގޮވާލައިފި އެވެ.

އެމްޑީޕީން ރޭ ނެރުނު ބަޔާނެއްގައި ބުނީ ވިލިނގިލީގައ ސްޓްރޯކެއް ޖެހި ހާލު ދެރަވި ކުޑަކުއްޖެއް ފަރުވާ ދިނުމަށް މާލެ ގެނައުން ސަރުކާރުގެ ސީދާ އިހުމާލުން 16 ގަޑިއިރަށް ވުރެ ލަސްވެ އެ ކުއްޖާގެ ފުރާނަ ގެއްލިފައިވާތީ އެމްޑީޕީން ހިތާމަ ކުރާ ކަމަށެވެ.

"މި ހާދިސާއާ ގުޅިގެން ސަރުކާރުން ނެރުނު ބަޔާނުގައި އިމަޖެންސީގައި ބަލި މީހުން އުފުލޭނެ އިންތިޒާމުތައް ހުރިކަން ކަށަވަރުވާއިރު, އެ ވަސީލަތްތައް ބޭނުން ނުކުރުން މި ޕާޓީން ހަރުކަށި އިބާރާތުން ކުށްވެރި ކުރަމެވެ." އެމްޑީޕީގެ ބަޔާނުގައިވެ އެވެ.

ސަރުކާރުގެ އިސްވެރިން މި ހާދިސާގެ ޒިންމާއިން ރެކި ދައުލަތުގެ ކުންފުނިތައް ބަދުނާމު ކުރާ ކުރުން ޕާޓީން ދެކެނީ ފިނޑި އަމަލެއްގެ ގޮތުގައި ކަމަށް އެމްޑީޕީން ބުންޏެވެ. މިކަމުގައި ސަރުކާރުގެ އިސްވެރިން ޒިންމާ ނަގައި އާއިލާގެ ފަރާތުން މާފަށް އެދުމަށް ވެސް ގޮވާލި އެވެ.

އެމްޑީޕީގެ ބަޔާނުގައި ވަނީ އެއާ އެމްބިއުލާންސްގެ ހިދުމަތް މާޗު މަހުގެ އެއްވަނަ ދުވަހު ފެށުމާ ހަމައަށް ރާއްޖޭގައި ލިބެން ހުރި ހުރިހާ ވަސީލަތެއް ބޭނުންޖެހޭ ކޮންމެ ހާލަތެއްގައި ފަސްނުޖެހި ބޭނުން ކުރުމަށް ގޮވާލައިފަ އެވެ.

"މިއީ ދިވެހި ދަރިއެއްގެ ފުރާނައަށް ވުރެ އަމިއްލަ ސިޔާސީ މަސްލަހަތު ސަރުކާރުން އިސްކުރި ދެވަނަ ފަހަރެވެ. ސަރުކާރުން ގޮތްދޫނުކުރުމުގެ އަގަކީ މައުސޫމު ދިވެހި ޅަދަރިންގެ ފުރާނައަށް މިއަދު މިވަނީ ވެފަ އެވެ." އެމްޑީޕީގެ ބަޔާނުގައިވެ އެވެ.