ކަރަން ސިންހް ގްރޯވަރްއާއި ބިޕާޝާ ބާސޫ މީގެ ހަތް އަހަރު ކުރިން ކައިވެނި ކުރިއިރު އެ ދެމީހުންނަށް ގިނަ ބައެއްގެ ފާޑުކިޔުން އަމާޒުވި އެވެ. އެހެން ނަމަވެސް މިއަދު އެ ދެމީހުންނަކީ އުފާވެރި ކައިވެންޏެއްގައި ދަރިއަކު ވެސް ބޮޑު ކުރަމުން އަންނަ ދެ މީހުންނެވެ.

ފިލްމީ ހަޔާތަށް ބަލާއިރު ވެސް ކަރަންއަކީ އާދައިގެ ޓީވީ އެކްޓަރަކުން ބޮލީވުޑްގައި ނަން ހިނގާ އެކްޓަރަކަށް ދަތުރުކުރި ކުޅަދާނަ އެކްޓަރެކެވެ. އޭނާ މިހާރު އަންނަނީ އޭނާގެ ކުރިއަށް އޮތް ފިލްމަށް ތައްޔާރު ވަމުންނެވެ.

ސިދްހާތު އަނަންދުގެ "ފައިޓާ"އާ ބެހޭގޮތުން ކަރަންގެ އަންހެނުން ބިޕާޝާ ބުނީ އެ ފިލްމުގައި އުޅޭ ހުރިހާ ތަރިން ވެސް ވަރަށް ރީތި ކަމަށާއި އޭނާ ކަރަންއާ ކައިވެނިކުރީ ވެސް އެހެންވެ ކަމަށެވެ.

ބިޕާޝާ އިތުރަށް ބުނީ އެ ފިލްމަކީ ސިދްހާތުގެ ފިލްމަކަށް ވުމުން ފިލްމު ކާމިޔާބު ވުމުގެ އިތުބާރު އެބަ އޮތް ކަމަށާއި އެއީ ދުރުގައިވާ ކަމެއް ނޫން ކަމަށެވެ.

ކަރަންގެ އިތުރުން ރިތިކް ރޯޝަންއާއި ދީޕިކާ ޕަދުކޯން މުހިއްމު ރޯލުތަކުން ފެންނަ "ފައިޓާ" ފިލްމަކީ ޕަތާންގެ ޑައިރެކްޓަރު ސިދްހާތު ޑައިރެކްޓްކުރާ ތުރިލާ ފިލްމެކެވެ.