ގްރޭޑް 10 އިން މަތީގެ ދަރިވަރުން މާލެ އާއި އެކި ރަށްރަށުގެ މިސްކިތްތަކުގައި އިމާމުވެ ހުކުރު ކުރުމުގެ ހުއްދައަށް އެދުމުގެ ފުރުސަތު އިސްލާމިކް މިނިސްޓްރީން މިއަދު ހުޅުވާލައިފި އެވެ.

އިސްލާމިކް މިނިސްޓްރީން ކުރި އިއުލާނެއްގައި ބުނީ އިމާމުންނާއި ހަތީބުންގެ ޒުވާން ޖީލެއް އުފެއްދުމުގެ ސިޔާސަތުގެ ދަށުން ގްރޭޑް 10، 11، 12 ގައި ތައުލީމް ހާސިލް ކުރަމުންދާ ނުވަތަ ސްކޫލް ނިންމާފައިވާ ދަރިވަރުންގެ ތެރެއިން ތަޖުވީދުގެ ހަމަތަކާ އެއްގޮތަށް ރީތިކޮށް ގުރުއާން ކިޔަވައި ނަމާދުގެ ފިގުހުގެ ބައިތަކަށް އަހުލުވެރިވެފައިވާ ދަރިވަރުންނަށް ރާއްޖޭގެ މިސްކިތްތަކުގައި އިމާމްވެ ހުކުރު ކުރުމުގެ ހުއްދަ ދިނުމަށް މިނިސްޓްރީން ނިންމާފައިވާތީ އެކަމަށް އެދި ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ.

އިމާމުވެ ހުކުރުކޮށް ހުތުބާ ކިއުމުގެ ހުއްދައަށް ހުށަހަޅާނީ އޮންލައިން ފޯމެއް މެދުވެރިކޮށެވެ. އެ ފޯމް މިނިސްޓްރީގެ ވެބްސައިޓުން ލިބޭނެ އެވެ.

ފޯމާއެކު ހުށަހަޅަން ޖެހޭ ތަކެތި:1. ދަރިވަރުގެ އައިޑީކާޑު ކޮޕީ

2. ތައުލީ ސެޓްފިކެޓްތަކުގެ ކޮޕީ

3. ގުރުއާން މުބާރާތުން ވަނަ ލިބިފައިވާނަމަ ލިބިފައިވާ ސެޓްފިކެޓްތަކުގެ ކޮޕީ

4. ސްކޫލްގައި އުޅޭނަމަ އެކަމުގެ ލިޔުން

5. 18 އަހަރު ނުވާނަމަ ބެލެނެވެރިޔާގެ އިއުތިރާޒެއް ނެތް ކަމުގެ ލިޔުން

ހުކުރު ކުރުމުގެ ހުއްދައަށް އެދި ހުށަހެޅުމުގެ ފުރުސަތު އަންނަ އަހަރުގެ ފެބްރުއަރީ މަހުގެ ނިޔަލަށް ވަނީ ހުޅުވާލައިފަ އެވެ.