ކަޕޫރު އާއިލާއަކީ ބޮލީވުޑްގެ އެންމެ ނުފޫޒުގަދަ އާއިލާތަކުގެ ތެރެއިން އާއިލާ އެކެވެ. އެ އާއިލާގެ ފާއިތުވެދިޔަ ހަތަރު ޖީލުގެ މެމްބަރުން ވެސް ބޮލީވުޑްގެ ތެރޭގައި އުޅެފައިވެ އެވެ.

1940ގެ އަހަރުތަކުގައި ޕްރިތްވީރާޖް ކަޕޫރު ބޮލީވުޑުން ފެނުނުއިރު އޭނާގެ ދަރިއެއް ކަމަށްވާ ރާޖް ކަޕޫރަކީ ބޮލީވުޑްގެ އެންމެ ފުރަތަމަ ސުޕަ ސްޓާރުގެ ގޮތުގައި ބެލެވޭ ތަރި އެވެ. ރާޖްއަށް ރިޝީ ކަޕޫރާއި ރަންދީރު ކަޕޫރު ހިމެނޭހެން ތިން ދަރިން ލިބުނުއިރު އެ އާއިލާގެ އެންމެ ފަހުގެ ޖީލުގެ ތަރިންގެ ތެރޭގައި ރަންބީރު ކަޕޫރާއި ކަރީނާ ކަޕޫރު ފަދަ ތަރިން ހިމެނެ އެވެ.

މިވަގުތު ކަޕޫރު އާއިލާގެ ހުރިހާ މެމްބަރުންގެ މިލްކިއްޔާތު އެއްކޮށް 1000 ކްރޯޑް ރުޕީސްއަށް އަރާއިރު އެ އާއިލާއަކީ އެންމެ ބޮލީވުޑްގެ އެންމެ މުއްސަނދި އާއިލާ ކަމުގައި ބުނެވިދާނެ އެވެ.

ވަކި ވަކި ތަރިންނަށް ބަލާއިރު ވެސް ކަޕޫރު އާއިލާގެ ތަރިންނަކީ ނިސްބަތުން ލިބޭ އާމްދަނީ ބޮޑު ތަރިންނެވެ. ފިލްމީ މަސައްކަތްތަކުގެ އިތުރުން އެހެނިހެން ކަންކަމުގައި ވެސް އެތަރިންގެ ހިއްސާ އޮވެ އެވެ.

ތަފާސް ހިސާބުތަކަށް ބަލާއިރު މިވަގުތު ކަޕޫރު އާއިލާގެ އެންމެ މުއްސަނދި ތަރިންގެ ލިސްޓުގެ އެންމެ ކުރީގައި އޮތީ ކަރީނާ ކަޕޫރު ޚާން އެވެ. އެގޮތުން އޭނާގެ މިލްކިއްޔާތު 485 ކްރޯޑް ރުޕީސްއަށް އަރާއިރު ކޮންމެ ފިލްމަކަށް ނަގާ 12 ކްރޯޑް ރުޕީސްގެ އިތުރުން ބްރޭންޑް އެންޑޯސްމަންޓްތައް ވެސް އޭނާ ގެންގުޅެ އެވެ.

ކަރީނާއާ އެންމެ ކައިރިން ވާދަކުރަނީ އެނިމަލްގެ ތަރި ރަންބީރު ކަޕޫރެވެ. އޭނާގެ މިލްކިއްޔާތު345 ކްރޯޑް ރުޕީސްއަށް އަރާއިރު އޭގެ ތެރޭގައި އަގުބޮޑު އެޕާޓްމަންޓްތަކާއި އިންޑިއަން ސުޕަ ލީގުގެ ޓީމެއް ކަމަށްވާ މުމްބާއީ ސިޓީ އެފްސީގެ ހިއްސާ ހިމެނެ އެވެ.

ރަންބީރުގެ އެންމެ ފަހުގެ ފިލްމު "އެނިމަލް"އަށް ލިބެމުން އަންނަ ކާމިޔާބާއެކު ކުރިއަށް އޮތް ތަނުގައި އޭނާގެ މިލްކިއްޔާތު އެއަށްވުރެ ވެސް އިތުރުވާނެ ކަމަށް ބެލެވެ އެވެ.