ބޮލީވުޑްގެ ބޮކްސް އޮފީސް ވިޔަފާރީގައި ފާއިތުވެދިޔަ މަސްދުވަހު ރަސްކަންކުރި ސަނީ ޑިއޯލްގެ "ގަދަރް 2" ފަހަތަށް ޖައްސާލައި ޝާހްރުކް ޚާންގެ "ޖަވާން" ކުރި ހޯދައިފި އެވެ.

މިދިޔަ އޮގަސްޓް މަހުގެ 11 ވަނަ ދުވަހު ގަދަރް 2 ރިލީޒް ކުރިއިރު ފުރަތަމަ ދުވަހު އެ ފިލްމަށް ލިބިފައިވަނީ 40 ކްރޯޑް ރުޕީސް އެވެ. އެހެން ނަމަވެސް ބުރާސްފަތި ދުވަހު ރިލީޒްކުރި ޖަވާންއަށް ފުރަތަމަ ދުވަހު އެކަނި ވެސް 75 ކްރޯޑް ލިބުނެވެ.

ގަދަރް ސިނަމާތަކުގައި އަޅުވާތާ މަހެއް ވާން ކައިރިވެފައިވާއިރު އެ ފިލްމުގެ ޖުމްލަ އާމްދަނީ އުޅެނީ 500 ކްރޯޑް ރުޕީސްގަ އެވެ. އެހެން ނަމަވެސް ޖަވާން ރިލީޒް ކުރުމާއެކު އެ ފިލްމުގެ ވިޔަފާރި މަޑުޖެހޭނެ ކަމަށް ލަފާކުރެވެ އެވެ.

ފުރަތަމަ ދުވަހުން ގަދަރްގެ ޖުމްލަ އާމްދަނީގެ ފަސްބައިކުޅަ އެއްބައި ޖަވާންއަށް ލިބިފައިވާއިރު ކުރިއަށް އޮތް އިންޑިއާގެ ހަފްތާ ބަންދުގެ ތެރޭގައި އެ ފިލްމުގެ އާމްދަނީ 230 ކްރޯޑް ރުޕީސްއަށް އަރާނެ ކަމަށް ވެސް މާހިރުން އަންނަނީ ބުނަމުންނެވެ.

މިހާތަނަށް ޖަވާންއަށް ލިބުނު އާމްދަނީއަށް ބަލާއިރު އެ ފިލްމުން ގަދަރުގެ ރެކޯޑްތައް މުގުރާލާނެ ކަމަށް ބެލެވެ އެވެ. ގަދަރްއަށް ލިބުނު ބޮޑު ކާމިޔާބީ ފާހަގަކޮށް އެ ފިލްމުގެ ޕްރޮޑިއުސަރުން ވަނީ ހަފްލާއެއް ވެސް ބާއްވާފަ އެވެ.

ޖަވާންގައި ޝާހްރުކް ޚާންގެ އިތުރުން ދެން ފެނިގެންދަނީ ދެކުނުގެ އެކްޓްރެސްއެއް ކަމަށްވާ ނަޔަންތްރާ އެވެ.