ގިނަ ބަޔަކު އިންތިޒާރު ކުރަމުން އަންނަ ޝާހްރުކް ޚާންގެ ކުރިއަށް އޮތް ފިލްމު "ޖަވާން"ގެ ފުރަތަމަ ޓްރެއިލާ އާއްމުކޮށް ނެރެފި އެވެ.

ޖަވާންގެ ޓްރެއިލާ ނެރެފައިވަނީ އެކަމަށްޓަކައި މިދިޔަ ބުރާސްފަތި ދުވަހު ދުބާއީގެ ބުރުޖް ޚަލީފާގައި ބޭއްވި ކުލަގަދަ ރަސްމިއްޔާތެއްގެ ތެރެއިންނެވެ.

މި ރަސްމިއްޔާތުގައި ފުރަތަމަ ފަހަރަށް ޓްރެއިލާ ދައްކާލިއިރު ފިލްމުގެ ލަވަ "ޒިންދާ ބަންދާ"އަށް ޝާހްރުކްގެ ފޯރިގަދަ ހުށައެޅުމެއްވެސް ފެނިގެން ގޮސްފައިވެ އެވެ.

ޖަވާންގެ ޓްރެއިލާ ނުކުތުމާއެކު އާއްމުން އަންނަނީ އެ ފިލްމުގެ އެކްޓިންއާއި ގްރެފިކްސްގެ އިތުރުން ވެސް އެކި ކަންކަމަށް ތައުރީފް ކޮށް "ގަރުނުގެ ޓްރެއިލާ"ގެ ނަމުން އެ ޓްރެއިލާއަށް ނަން ދީފަ އެވެ.

https://www.youtube.com/watch?v=COv52Qyctws

އަތުލީ ޑައިރެކްޓްކޮށް ޝާހުގެ އިތުރުން ދެކުނުގެ އެކްޓްރެސް ނަޔަންތުރާ ފެނިގެންދާ އެ ފިލްމު އެޑްވާންސް ބުކިންއަށް ހުޅުވާލާފައިވާއިރު އެމެރިކާއިން އެކަނި ވެސް މިހާތަނަށް އެ ފިލްމަށް ދެ ކްރޯޑް ލިބިފައިވެ އެވެ. އިންޑިއާގައި ފިލްމުގެ ޓިކެޓެއްގެ އަގު އުޅެނީ ދެހާސް ރުޕީސްއަށްވުރެ މަތީގަ އެވެ.

ޖަވާން ސިނަމާ ތަކަށް އަންނަން ހަމަޖެހިފައިވަނީ މި ސެޕްޓެމްބަރު މަހުގެ ހަތްވަނަ ދުވަހު އެވެ. މި ފިލްމުން ޝާހުގެ އެންމެ ފަހުގެ ފިލްމު "ޕަތާން"ގެ ރެކޯޑުތައް މުގުރާލާނެ ކަމަށް މާހިރުން އަންނަނީ ބުނަމުންނެވެ.