މި ހަފްތާގެ ތެރޭގައި އެންމެ ދުނިޔޭގެ މަޝްރަހުން ފާހަގަ ކޮށްލެވުނު އެއް ހަބަރަކީ އިންޑިއާގެ ޖައްވީ އުޅަނދު "ޗަންދްރަޔާން 3" ހަނދުގެ ސަތަހައަށް ކާމިޔާބު ކަމާއެކު ޖެއްސި ހަބަރެވެ.

އެއާއެކު ހަނދާއި ހަނދާ ގުޅުންހުރި ކަންކަމުގެ ވާހަކަތައް އިންޑިއާގެ ނޫސްތަކުގެ ފަލަ ސުރުހީތަކަށް އަންނަން ފެށި އެވެ. އެގޮތުން އައި އެއް ހަބަރަކީ ފިލުމީ ތަރި ޝާހްރުކް ޚާންގެ ހަބަރެކެވެ.

އިންޑިއާގެ ނޫސްތަކުން ރިޕޯޯޓު ކޮށްފައިވާ ގޮތުގައި ޝާހްރުކް ޚާންގެ މިލްކިއްޔާތުގައި ހަނދުގެ ސަތަހައިން ވަރަށް ބޮޑު ބިމެއް އޮވެ އެވެ.

ހައިރާން ވާންޖެހޭ އަނެއްކަމަކީ މި ބިމަކީ ޝާހު އަމިއްލައަށް ގަނެފައިވާ ބިމެއް ނޫން ކަމެވެ. މިއީ އޮސްޓްރޭލިއާއަށް ނިސްބަތްވާ ޝާހުގެ ސަޕޯޓަރަކު ކޮންމެ އަހަރަކު އޭނާގެ އުފަންދުވަހު ދޭ ހަދިޔާ އެކެވެ.

އެގޮތުން އެކި އަހަރުތައް މަތިން ޝާހުގެ ބިން ބޮޑުވެފައިވާއިރު އެ ބިމަށް އޭނާ ވަނީ " ދަ ސީ އޮފް ޓްރެންކުއިލިޓީ"ގެ ނަމުން ނަންދީފަ އެވެ.

ޝާހްރުކް ޚާންގެ އިތުރުން ހަނދުން ބިމެއް މިލްކުވެފައިވާ ބޮލީވުޑް ތަރިންގެ ތެރޭގައި 2020 ވަނަ އަހަރު މަރުވި ސުޝާންތު ސިންހް ރާޖްޕުތު ވެސް ހިމެނެ އެވެ.