އެމެރިކާގެ ލޮސް އެންޖެލިސްގައި ކުރިއަށްދިޔަ ފިލްމު ޝޫޓީނެއްގެ ތެރެއިން ބޮލީވުޑްގެ މަޝްހޫރު އެކްޓަރު ޝާހްރުކް ޚާން އެކްސިޑެންޓެއްވުމުގެ ސަބަބުން ކުޑަ އޮޕަރޭޝަނެއް ކޮށްފި އެވެ.

މީޑިއާ ރިޕޯޓްތައް ބުނާ ގޮތުގައި ލޮސް އެންޖެލިސްގައި ޝޫޓިން ކުރިއަށް ދަނިކޮށް ދިމާވި ހާދިސާއަކު ޝާހްރުކްގެ ނޭފަތަށް ގެއްލުންތަކެއް ވަނީ ލިބިފަ އެވެ. މިކަމާ ގުޅިގެން ޝާހްރުކް ވަގުތުން ހޮސްޕިޓަލަށް ގެންގޮސްފައިވާއިރު ނޭފަތުން ލޭ އައުން މަނާކުރުމަށް ޝާހްރުކް ވަނީ ކުޑަ އޮޕަރޭޝަނެއް ކޮށްފަ އެވެ.

އޮޕަރޭޝަނަންފަހު ޝާހްރުކް ރަގަޅުވަމުން އަންނަ ކަމަށްވެސް ރިޕޯޓްތައް ބުނެ އެވެ. ޝާހްރުކް މިވަގުތު ހުރީ ޝޫޓިން މެދުކަނޑާލުމަށްފަހު މުމްބާއީގަ އެވެ.

"ޕަތާން" ގެ ކާމިޔާބީއަށް ފަހު ޝާހްރުކް މި ވަގުތު އެންމެ ބިޒީކޮށް އުޅެނީ ސެޕްޓެމްބަރު 7 ގައި ސިނަމާތަކަށް ގެންނަން ނިންމާފައި އޮތް ޑައިރެކްޓަރު އެޓްލީގެ ފިލްމު "ޖަވާން" ގެ މަސައްކަތުގެ އެވެ. ރިޕޯޓްތައް ބުނާ ގޮތުން މީގެ ޓީޒާ އަންނަ ހުކުރު ދުވަހު އާންމުކުރާނެ އެވެ.

"ޖަވާން"ގެ އިތުރުން ޝާހްރުކްގެ "ދުންކީ"ވެސް މިއަހަރު ރިލީޒްކުރުމަށް ވަނީ ނިންމާފަ އެވެ. މިފިލްމު ރިލީޒްކުރާނީ ޑިސެމްބަރު މަހު އެވެ.

ކެޓްރީނާ ކައިފް އާއި ސަލްމާން ހާންގެ އެކްޝަން ތުރިލާ ފިލްމް "ޓައިގާ 3" ގައި ޝާހުރުކްގެ ކުޑަ ރޯލެއް ވެސް ފެންނާނެ އެވެ.