އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދަށް 3 އަހަރު ވެރިކަން ކޮށްނުލެވުނު ކަމަށް ވިދާޅުވެ، ރައްޔިތުންގެ މަޖިލީހުގެ ކޮމަންޑޫ ދާއިރާގެ މެމްބަރު މުހައްމަދު ރާޝިދު ވަރަށް ބޮޑަށް މަލާމާތްކުރައްވައިފި އެވެ.

ރާޝިދު މިފަދަގޮތަކަށް ރައީސް ނަޝީދަށް މަލާމާތް ކުރައްވާފައިވަނީ ރައްޔިތުން މަޖިލީހުގެ އައްޑޫ މީދޫ މެމްބަރު ރޮޒައިނާ އާދަމް އަށް ނިސްބަތްކޮށް ކޮށްފައިވާ ޓްވީޓަކަށް ރައްދު ދެއްވަމުން ކުރެއްވި ޓްވީޓެއްގަ އެވެ. ރޮޒައިނާއަށް ނިސްބަތްކޮށް ޓުވީޓުކޮށްފައިވަނީ "ހަސަން ކުރުސީ"ގެ ނަމުގައި ހިންގާ ޓްވީޓާ އެކައުންޓަކުންނެވެ.

ރާޝިދު ވިދާޅުވީ އެންމެ ބޮޑު ސިޔާސީ ޕާޓީގެ ރައީސްކަން 18 އަހަރު ކުރިއިރު ގައުމުގެ ވެރިކަން 3 އަހަރު ކޮށްލަން ނޭނގުނު ކަމަށެވެ.

އަދި މިއަދު ޕާޓީވެސް ގެއްލެނީކަމަށާއި އެފަދަ ކަންކަން ވަނީ އަމިއްލަ އެދުމާއިހެދިކަމަށެވެ.ރައީސް ނަޝީދަށް ވަރަށް ބޮޑަށް ފާޑު ވިދާޅުވެ ރާޝިދު އިތުރަށް ވިދާޅުވީ ވެރިކަން ނުލިބި ބޮޑުކަން ނުލިބުމުން އެހެން މީހުން ބޮލުގައި އިލްޒާމްތައް އަޅުވަން ނުޖެހޭކަމަށެވެ.

މެމްބަރު ރާޝިދަކީ މިހާރު ރައީސް ސޯލިހަށް ތާއީދު ކުރައްވާ ބޭފުޅެކެވެ.

ކޮމަންޑޫ ދާއިރާގެ ގޮނޑިއަށް ހޮވި ވަޑައިގެންނެވި ފަހުން ރާޝިދު ގެންދަވަނީ ރައީސް ނަޝީދަށް ނިސްބަތްކޮށް ވަރަށް ބޮޑަށް ފާޑު ވިދާޅުވަމުންނެވެ. ރައީސް ނަޝީދަކީ ރާޝިދުގެ ކެޕްމެއިންގައި އަމަލީ ގޮތުން ބައިވެރިވެ ވަރަށް ގިނަ މަސައްކަތްތައް ކޮށްދެއްވި ބޭފުޅެކެވެ.