ސުޓޫޑަންޓު ލޯނަށް އަނބުރާ ފައިސާ ހޯދުމަށް ކޯޓަށް ދާން ޖެހިއްޖެ ހާލަތެއްގައި ކޯޓަށްވެސް ދާނެ ކަމަށް ހަޔަރ އެޑިއުކޭޝަން މިނިސްޓަރު ޑރ. އިބްރާހީމް ހަސަން ވިދާޅުވެއްޖެ އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރ ވިދާޅުވީ ސަރުކާރުން ދަރިވަރުންނަށް ލޯނު ދެނީ ވަރަށް ބޮޑެތި ގުރުބާނީތަކެއް ވެގެން ކަމަށެވެ. ރާއްޖޭގެ ތަރއްގީއަށްޓަކާ ކުރަންޖެހޭ ބޮޑެތި ހޭދަތައް ހުރިކަމަށާ އެކަމަކު އެކަންކަން ބަހައްޓަފައި ދަރިވަރުންނަށް ކިޔަވަން ލޯނު ދެނީ މީހުން ބިނާ ކުރުމަށް ކަމަށް މިނިސްޓަރު ވިދާޅުވިއެވެ.

މިނިސްޓަރު ހަސަން ވިދާޅުވީ ލޯނުގެ ގޮތުގައި ދޭ ފައިސާ އަނބުރާ ދެއްކުމަކީ ދަރިވަރުންގެ ބޮލުގައި އޮތް ޒިންމާއެއް ކަމަށެވެ. ލޯނުގެ ފައިސާ ހޯދަން ކުރަންޖެހުނު ހުރިހާ ކަމެއް ކުރާނެ ކަމަށް މިނިސްޓަރ ވިދާޅުވިއެވެ. އަދި މުސްތަގުބަލުގައި އެހެން ކުދިންނަށްވެސް އެފުރުސަތު ފަހިވެގެންދާނީ ލޯނު ފައިސާ ދެއްކުމުން ކަމަށް މިނިސްޓަރ ވިދާޅުވިއެވެ.

މިނިސްޓަރު ވިދާޅުވީ އެފައިސާ ހޯދުމަށްޓަކާ ކުރަން ހުރި ހުރިހާ މަސައްކަތެއް ކުރާނެ ކަމަށެވެ.

2021 ވަނަ އަހަރުގެ ހަޔަރ އެޑިއުކޭޝަން މިނިސްޓްރީގެ އޮޑިޓް ރިޕޯޓުގައި ވާގޮތުން އެކި ސްކީމް ތަކަށް ހަޔަރ އެޑީއުކޭޝަނުން ދޫކޮށްފައިވާ ލޯނުތަކުން ހަޔާ އެޑިއުކޭޝަން މިނިސްޓްރީއަށް އަނބުރާ ނުލިބި 186 މިލިއަން ރުފިޔާ ހުރިކަމަށެވެ. އަދި އެ ފައިސާ ހޯދުމަށް އެކަށީގެންވާ މަސައްކަތްތަކެއް ކޮށްފައި ނުވާ ކަމަށްވެސް އޮޑިޓް ރިޕޯޓުގައި ބުނެފައިވެ އެވެ.

އަދި ހިލޭ ޑިގްރީ އަށް ކިޔެވުމުގެ ސްކީމްގެ ދަށުން ފައިސާ ދޫކުރި ދަރިވަރުންގެ ރެކޯޑުތައް ރަނގަޅަށް ބަލަހައްޓާފައެއް ނުވަ ކަމަށްވެސް އެ އޮޑިޓް ރިޕޯޓުގައި ވެއެވެ.