ހެންވޭރު ސަހަރާގެ މަހާނައެއް ކޮނުނު މުވައްޒަފާ މެދު ފިޔަވަޅު އަޅަން ސިޓީ ކައުންސިލުން ނިންމައިފި އެވެ.

ހެންވޭރު ސަހަރާތެރެއަށް ތިން މީހަކު ވަދެ މަހާނަތައް ކޮންނަ މަންޒަރު ފެންނަ ވީޑިއޯއެއް ސޯޝަލް މީޑިއާގައި ވަނީ ދައުރުވާން ފަށައިފަ އެވެ.

އެ ވީޑިއޯއިން ފެންނަ ގޮތުގައި، މާލޭ ސިޓީ ކައުންސިލުގެ ބިދޭސީ މުވައްޒަފަކު އެތަނުގެ ތެރޭގައި އުޅެ އެވެ.

އެ ވީޑިއޯ ދައުރުވާން ފެށުމުން ބައެއް ފަރާތްތަކުން ވަނީ އެތަނުގައި ހުރި މަހާނަތައް ކޮނެ، މިނިކަށިތަކެއް ނެގި ކަމަށް ތުހުމަތުކޮށްފަ އެވެ. އަދި މަހާނައިން ނެގި އެއްޗެހި ކޮތަޅަކަށް ލައިގެން ގެންދާ މަންޒަރު ވެސް އެ ވީޑިއޯއިން ފެނެ އެވެ.

އެކަމާ ގުޅޭގޮތުން ސިޓީ ކައުންސިލުން މިއަދު ބުނީ ސަހަރާއިން ނަގާފައި ވަނީ މިނި ކަށިތަކެއް ނޫން ކަމަށާއި، އެއީ ސިހުރު ހަދާފައިވާ ފިލާކޮޅުތަކެއް ކަމަށެވެ. ނަމަވެސް ކައުންސިލުގެ މުވައްޒަފަކު އެކަމުގައި ބައިވެރިވީ ކައުންސިލުގެ ހުއްދައެއް ނެތިކަން އެ އިދާރާއިން ފާހަގަކުރެ އެވެ.

އޭގެ އިތުރުން، އެކަން ބެލުމަށްފަހު، އެ މުވައްޒަފާ މެދު ފިޔަވަޅު އެޅުމަށް މިހާރު ނިންމާފައިވާކަމަށް ވެސް މާލޭ ސިޓީ ކައުންސިލުން ބުނެ އެވެ.