އެމްޑީޕީގެ ރިޔާސީ ޕްރައިމަރީ ކާމިޔާބު ކުރެއްވި ރައީސް އިބްރާހިމް މުހައްމަދު ސޯލިހާ މެދު ހިތްޕުޅު ހަމަޖެހިވަޑައިނުގަތަސް ޕާޓީ ދޫކޮށްލެއްވުން އަދި އެހެން ޕާޓީއެއް ހެދުމުގެ ވިސްނުންފުޅެއް ވެސް ނެތް ކަމަށް އެ ޕްރައިމަރީން ބަލިވި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

އެ މަނިކުފާނުގެ ކެމްޕެއިން ޓީމުތަކަށް ދޮންމަނިކު ސްކައި ވިއު ރެސްޓޯރަންޓުން ދެއްވި ކެއުމެއްގައި ވާހަކަފުޅު ދައްކަވަމުން ނަޝީދު ވިދާޅުވީ އެމްޑީޕީ ދޫކުރައްވާފައި ވަޑައިގަތުމަށް އެ މަނިކުފާނު ދުވަހަކު ވެސް ގަސްދެއް ނުކުރައްވާ ކަމަށެވެ.

ނަޝީދުގެ ވިސްނުންފުޅު ހުރީ "ފިކުރެއްގެ ދިރުން" ގެ ނަމުގައި އެމްޑީޕީގައި ވަކި ގޮތްޕެއް ހަދައިގެން ކުރިއަށް ގެންދާށެވެ.

ރައީސް ނަޝީދުގެ ކެމްޕެއިން ޓީމުތަކަށް ދޮންމަނިކު ސްކައި ވިއު ރެސްޓޯރަންޓުން ދެއްވި ކެއުމެއްގައި އެ މަނިކުފާނު ސަޕޯޓަރުން ޖަމާވެފައި.

"އެމްޑީޕީ އެކަނި އަޅުގަނޑު ދަންނަ ސިޔާސީ ޕާޓީއަކީ. އަދި އަޅުގަނޑު ދެކޭގޮތުގައި އެއީ އުވޭނެ ޕާޓީއެއް ވެސް ނޫން. ބަލިވާނެ ޕާޓީއެއް ވެސް ނޫން. އެއީ ގަދަ ޕާޓީއެއް،" ޕްރައިމަރީގެ ނާކާމިޔާބީ އަށް ފަހު ފުރަތަމަ ފަހަރަށް ސަޕޯޓަރުންނާ ވާހަކަފުޅު ދައްކަވަމުން އެ މަނިކުފާނު ވިދާޅުވި އެވެ.

"އަޅުގަނޑު ދެކޭގޮތުގައި އެ ޕާޓީގެ ތެރޭގައި އަޅުގަނޑުމެންނަށް އިންތިޒާމު ވެވޭނެ. އެ ޕާޓީގެ ހިންގާ ގަވާއިދު ވެސް ޖާގަ ދޭނެ. އަދި އެ ޕާޓީގެ ރޫހާއި އެ ޕާޓީގެ އުސޫލުތައް ވެސް މި ކަމަށް ޖާގަ ދޭނެ."

އެ މަނިކުފާނު ވިދާޅުވި ގޮތުގައި މީގެ 20 އަހަރުކުރިން އެމްޑީޕީ އުފެއްދީ ވެސް އެކަމަށް ފުރުސަތު ދީގެން ނޫން ކަމަށެވެ. އެހެންވެ، ރިޔާސީ ޕްރައިމަރީގެ ކެމްޕެއިނަށް ނަޝީދު ގެންގުޅުއްވި "ފިކުރެއްގެ ދިރުން" ސްލޯގަންގެ ގޮފި ހެދުން ހުއްޓުވޭނެ އެއްވެސް ގޮތެއް ވެސް ނޯންނާނެ ކަމަށް ވެސް ވިދާޅުވި އެވެ.

ރައީސް ސޯލިހާ އެކު ރިޔާސީ އިންތިހާބު "އެމްޑީޕީއަށް ކާމިޔާބެއް ނުކުރެވޭނެ" ކަމަށް ވިދާޅުވެ، އެކަމާ ޕާޓީން ފުންކޮށް ވިސްނުމަށް ނަޝީދު އެދިވަޑައިގެންނެވި އެވެ. އެއަށް ފަހު، ނަޝީދުގެ ސިޔާސީ މަސައްކަތް އިތުރަށް ކުރިއަށް ގެންދަވާނެ ގޮތުގެ ތަފްސީލެއް ދެއްވި އެވެ. އެގޮތުން ނަޝީދު ވިދާޅުވީ ކޮންމެ ރަށެއްގައި ވެސް ފިކުރެއްގެ ދިރުން ނަމުގައި ހަތަރު ފަސް ގޮފި ހަދާނެ ކަމަށާއި އެކަން ކުރާނީ ހާއްސަ އިދާރާއެއް އުފައްދައިގެން އަންނަ މާޗް ނުވަތަ ޖުލައި މަހުގެ ނިޔަލަށް ކަމަށް ވިދާޅުވި އެވެ. އަދި އެ ގޮފިތަކަށް 50،0000 މެންބަރުން ހަމަކުުރުމަކީ އަމާޒެއް ކަމަށް ވެސް އެމަނިކުފާނު ވިދާޅުވި އެވެ.

ނަޝީދު ދެކެވަޑައިގަންނަވާ ގޮތުގައި މި ގޮތަށް ގޮފި ހެދުމުގެ މަސައްކަތް "ހުއްޓުވޭނެ އެއްވެސް ގޮތެއް ނޯންނާނެ" އެވެ.

"އެމްޑީޕީ ހަދާފައި އެ އޮތީ ހަގީގަތުގައި މީހަކު ޖާގަ ދީގެން ވެސް ނޫން. އަޅުގަނޑުމެން ހެދި ޕާޓީއެއް އެއީ ހަމަ. އަޅުގަނޑުމެންގެ ފިކުރެއްގެ ދިރުމުގެ ގޮފި، އެމްޑީޕީ ތެރޭގައި ހެދުން ހުއްޓުވޭނެ އެއްވެސް ގޮތެއް ނޯންނާނެ. އެއީ އަޅުގަނޑުމެން ހިންގާ، އަަޅުގަނޑުމެންގެ އަމިއްލަ މަސައްކަތެއް،" ނަޝީދު ވިދާޅުވި އެވެ.