އިއްޔެ ކުރިޔަށް ގެންދިޔަ އެމްޑީޕީ ރިޔާސީ ޕްރައިމަރީގެ ވޯޓުގެ ނަތީޖާ ސައްހަ ކަމަށާއި، ވޯޓު ގަޑުބަޑުކޮށްފައި ނުވާނެ ކަމުގެ ޔަޤީންކަން އެޕާޓީން ދީފި އެވެ.

އެމްޑީޕީގެ ޕްރައިމަރީ އިންތިޒާމްކުރި ކޮމިޓީން އެމްޑީޕީ އޮފީހުގައި މިއަދު ހެނދުނު ބޭއްވި ނޫސްވެރިންގެ ބައްދަލުވުމެއްގައި ބުނެފައިވަނީ ނަތީޖާ ޝީޓުތައް އާންމުކުރި އިރު ވޯޓު ފޮށީގެ ލިސްޓުގައިވާ މީހުންނަށްވުރެ އިތުރަށް ފޮށިތަކަށް ވޯޓުލާފައި ހުރުމުން ބައެއް ފަރާތްތަކުން ސުވާލު އުފައްދާފައިވީ ނަމަވެސް ވޯޓާސް ލިސްޓުގައިވާ މީހުންގެ އިތުރަށް ފޮށިތަކަށް ވޯޓު ލާފައި ނުވާނެ ކަމަށެވެ.

"އެ ކަހަލަ އެއްވެސް ޝަކުވާއެއް ނެތް... ޝަކުވާގެ ގޮތުގައި އެބަހުރި ބުނެފައި ވޯޓާސް ލިސްޓުގައި ނަން ނެތް ނުވަ މީހުން ވޯޓުލައިފިއޭ. ދެން އަޅުގަނޑުމެން ކިހިނެއްތޯ ހޯދާނީ؟ ކޮން ފޮއްޓަކަށް، ކާކު ކަމެއް ބުނެދޭން ވާނެ. އެންމެ ކުޑަމިނުން ނެތް މި ވެނި ފޮއްޓަކަށޭ ނުވަ މީހުން ވޯޓު ލީ ބުނެފައި،" ނަތީޖާއަށް ބަދަލު އަންނަ ވަރުގެ ޝަކުވާއެއް ލިބިފައިވޭތޯ ނޫސްވެރިޔަކު ކުރި ސުވާލުގެ ޖަވާބުގައި ކޮމެޓީގައި ހިމެނިވަޑައިގަންނަވާ ޗެއާޕާސަންގެ ނައިބު އިދާރީ އިބްރާހިމް ވަހީދު (އިބުރޭ) ވިދާޅުވި އެވެ.

ނަޝީދު ޓީމުން ތުހުމަތުކުރާ ގޮތުގައި، ފޮށިތަކަށް ވަގު ވޯޓު އަޅާފައިވެ އެވެ. ނަމަވެސް، އެކަން ވެސް އިބްރާހިމް ވަހީދު ދޮގު ކުރެއްވި އެވެ."އަޅުގަނޑުމެން ގަބޫލެއް ނުކުރަން ވަގު ވޯޓު އެޅުމަށް ފުރުސަތު އޮތް ކަމަށް،" އޭނާ ވިދާޅުވި އެވެ.

ވޯޓު ފޮއްޓަށް ވޯޓުލާނެ މީހުންގެ ލިސްޓު ތައްޔާރުކޮށްފައި ވަނީ އެންމެ ފަހުން އެމްޑީޕީއިން ކުރިއަށް ގެންދިޔަ އެޕާޓީގެ ޗެއާޕާސަން އިންތިހާބުގައި މެންބަރުން ވޯޓުލީ ތަންތަން ކަމަށް ބަލައިގެން ކަމަށް އެމްޑީޕީން ވަނީ ބުނެފައެވެ.

އިބްރޭ ވިދާޅުވީ މީގެ ކުރިން އަމަލުކުރާ ގޮތަކީ މާލޭގައި ވެސް އަދި ރަށުގައި ވެސް އެންމެނަށް ވޯޓު ލެވޭ ވަރަށް ކަރުދާސް ބަހައްޓައިގެން ވޯޓުލުން ކުރިއަށް ގެންދާ ގޮތަށް ކަމަށާއި ނަމަވެސް މިފަހަރު މިގޮތަށް ނިންމީ އެއީ އެންމެ ރަނގަޅު ގޮތް ނޫން ކަމަށް ވާތީ ކަމަށެވެ. އެހެންކަމުން ޕްރިންޓުކުރީ ވޯޓާސް ލިސްޓުގައިވާ ޖުމްލަ އަދަދު ކަމަށްވާ 57،255 ކަރުދާސް ކަމަށް ވިދާޅުވިއެވެ.

އަދި ވޯޓު ކަރުދާސް ފޮނުވީ އެންމެ ފަހުން ޗެއާޕާސަން އިންތިހާބުގައި ވޯޓުލީ މީހުން ވޯޓުލީ ފޮށިތަކަށް ބަލާ އަންދާޒާކޮށްގެން ކަމަށް އިބްރޭ ވަނީ ވިދާޅުވެފަ އެވެ.

އިއްޔެ ކުރިއަށް ގެންދިޔަ އިންތިހާބު ބޮޑު ތަފާތަކުން ކާމިޔާބުކުރެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް އެވެ. ވަގުތީ ނަތީޖާތަކުން ދައްކާ ގޮތުން ރައީސް ސޯލިހަށް 61 އިންސައްތަ ކާމިޔާބު ކުރެވިފައިވާއިރު ރައީސް ނަޝީދަށް ކާމިޔާބުކުރެވުނީ 39 އިންސައްތަ އެވެ.