ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހަށް ތާއީދު ކުރެއްވުމަށްފަހު އެމްޑީޕީގެ ރައީސް މުހައްމަދު ނަޝީދަށް ތާއީދު ކުރައްވަން ކުޅުދުއްފުށީ ދެކުނު ދާއިރާގެ މެންބަރު ޔާސިރު އަބްދުއްލަތީފް ނިންމަވައިފި އެވެ.

ޔާސިރު މިއަދު ނެރުއްވި ބަޔާނެއްގައި ވިދާޅުވީ ފާއިތުވި ހަތަރު އަހަރު ރައްޔިތުންގެ މަޖިލީހުގެ މެންބަރެއްގެ ހައިސިއްޔަތުން ރައްޔިތުންގެ ކުރިއެރުމަށް އަދި ހާއްސަކޮށް ކުޅުދުއްފުށީގެ ތަރައްގީއަށް އަދުގެ ސަރުކާރަށް ދޭން ޖެހުނު ހުރިހާ އެއްބާރުލުމެއް އޭނާ ދީފައިވާނެ ކަމަށެވެ.

ނަމަވެސް ރައީސް ސޯލިހުގެ ފަރާތްޕުޅުން ކުޅުދުއްފުއްޓާ މެދު ފެނިފައި ވަނީ ވަރަށް ގަޔަށް ދޫ ސިޔާސަތެއް ކަމަށް އޭނާ ވިދާޅުވި އެވެ. އެހެންވެ އެމްޑީޕީ ރިޔާސީ ޕްރައިމަރީ ގައި ރައީސް ސޯލިހަށް ކުރި ތާއީދު އަނބުރާ ގެންގޮސް ނަޝީދަށް ތާއީދު ކުރުމަށް ނިންމާފައިވާ ކަމަށް ޔާސިރު ވިދާޅުވި އެވެ.

އޭނާ ވިދާޅުވީ ނަޝީދަކީ ވިސްނުމާއި، އިލްމާއި ހިލްމު އަދި ބުންވަރާއި، ހިތްވަރު ހުރި ހަމައެކަނި ސިޔާސީ ލީޑަރު ކަމަށެވެ. އަދި އެމަނިކުފާނަކީ ވިސްނުމާއި، އިލްމާއި ހިލްމު އަދި ބުންވަރާއި، ހިތްވަރަށް ބެލިކަމުގައި ވިޔަސް ދިވެހިރާއްޖޭގައި މިވަގުތު ހުރި އެންމެ ވަރުގަދަ ސިޔާސީ ލީޑަރު ކަމަށް ޔާސިރު ވިދާޅުވި އެވެ.

މީގެ ކުރިން ނަޝީދަށް ތާއީދު ކުރެއްވި ގިނަ އަދަދެއްގެ މެންބަރުން މިހާރު ވަނީ ރައީސް ސޯލިހަށް ތާއީދު ކުރައްވަން ނިންމަވާފަ އެވެ. ހާއްސަކޮށް މަޖިލީހުގެ މެޖޯރިޓީ މެމްބަރުން ތާއީދުކުރައްވަނީ ރައީސް ސޯލިހަށެވެ.