ރާއްޖޭގެ އެންމެ ގިނަ ދުވަސްވީ ސިނަމާ، އޮލިމްޕަސް ކޮވިޑާ ގުޅިގެން 2020 ވަނަ އަހަރުގެ މާޗް މަހުން ބަންދުކޮށްފައި ހުރުމަށް ފަހު އަލުން ހުޅުވުމަށް އަންނަނީ މަސައްކަތް ކުރަމުންނެވެ. މިފަހަރު އޮލިމްޕަސް ހުޅުވާނީ ޒަމާނީ ފެންވަރަށް ތަރައްގީކުރުމަށްފަހު ކަމަށް ސަރުކާރުން ވަނީ ބުނެފަ އެވެ.

އަންނަ މަހުން ފެށިގެން އޮލިމްޕަސް އަންނަ މަހުގެ އެތަން 15 ވަނަ ދުވަހުން ފެށިގެން ކުއްޔަށް ދޫކުރުމަށް ނިންމާ އެޑްވާންސް ބުކިނަށް އެތަން ބަލަހައްޓާ ފަރާތް ކަމަށްވާ ނޭޝަނަލް ސެންޓަރު ފޯ ދި އާޓްސް (އެންސީއޭ)އިން ވަނީ ހުޅުވާލާފަ އެވެ.

މިއާއެކު ރާއްޖޭގެ ފިލްމީ ދާއިރާގައި އެންމެ ގިނަ މަސައްކަތް ކުރަމުން އަންނަ އެއް ޕްރޮޑަކްޝަން ހައުސް ކަމަށްވާ ޑާކްރެއިން އެންޓަޓެއިންމަންޓުން މިވަނީ އަންނަ ފެބްރުއަރީ ހައެއް ގައި ފިލްމެއް އެޅުވުމަށް ނިންމާފަ އެވެ.

ޑާކްރެއިން ބުނީ މަޝްހޫރު ސްކްރީން ރައިޓަރު އަހުމަދު ޒަރީރު ލިޔެ ޑައިރެކްޓް ކޮށްދައިވާ އޭނާގެ ފުރަތަމަ ފީޗާ ފިލްމު "ބީވީމާ" އަންނަ އަހަރުގެ ފެބްރުއަރީ ހައެއްގައި އޮލިމްޕަހަށް އަންނާނެ ކަމަށެވެ. އަދި މި ފިލްމުގެ ރަސްމީ ޕޯސްޓަރު މިމަހު 26 ގައި ރިލީޒްކުރާނެ ކަމަށާއި އެފިލްމުގެ ޓްރެއިލާ އަންނަ މަހުގެ ދެ ވަނަ ދުވަހު ރިލީޒް ކުރުމަށް ނިންމާފައިވާ ކަމަށް ޑާކްރެއިން ބުނެ އެވެ.

https://www.facebook.com/Beeveema/posts/612896687340763

ޑާކްރެއިން އެންޓަޓެއިންމަންޓުގެ ދަށުން ގެނެސްދޭ މި ފިލްމުގެ ޕްރޮޑިއުސަރަކީ މުހައްމަދު އަލީ (މޮގާ) އާއި އޭނާގެ އަންހެނުން އައިޝަތު ފުއާދު ތައުފީގެވެ. މުހައްމަދު ވިޝާން (ކަނޑި) ކެމެރާ ކުރާ މި ފިލްމުގެ ތަރިންނަކީ ލަވަކިޔުންތެރިޔާ އަޝްފާ، ކޮޕީ އިއްސެ، އައިޝަތު ޔާދާ، ސިލްނާ، އާޝާ، ޢައިޝަތު އަލީގެ އިތުރުން ހުނޭޝާ އާދަމް ނަސީރު އެވެ.

އޭގެ އިތުރުން އަލީ ޝަޒްލީމް އާއި ޑާކްރެއިންގެ މިއީ ލޯތްބަކީ އިން ފެނިގެންދިޔަ ލަވަކިޔުންތެރިޔާ އަމަންގެ ކޮއްކޮ އާދަމް ޒިދާން (ނާނަ) ވެސް މި ފިލްމުން ފެނިގެންދާނެ އެވެ.

ޑާކްރެއިނުން މިހާރުވެސް ސިނަމާތަކަށް ގެންނަން ނިންމާފައިވާ ތިން ފިލްމެއް އެބައޮތެވެ. އެއީ "ބަޅިނދު"، "ނޮވެމްބަރ" އަދި "ހިނދުކޮޅެއް" މި ތިން ފިލްމެވެ.