ބޮލީވުޑްގެ މަޝްހޫރު ތަރި ޝާހްރުކް ހާން އުމްރާގެ އަޅުކަން އަދާކޮށްފި އެވެ.

ޝާހްރުކް އުމްރާގެ އަޅުކަން އަދާކޮށްފައި މިވަނީ ސައުދީގައި އޭނާގެ ކުރިއަށް އޮތް ފިލްމު "ދުންކީ" ގެ ޝޫޓިން އަށް ފަހު އެވެ.

ސޯޝަލް މީޑިއާގައި ޝާހްރުކް އުމްރާގެ އަޅުކަން އަދާކުރަނިކޮށް ނަގާފައިވާ ފޮޓޯތަކާއި ވީޑީއޯތައް ވަނީ އާއްމުވެފަ އެވެ.

އެ ފޮޓޯތަކުން ޝާހްރުކް ފެންނަނީ އިހްރާމް ބަދެގެން ހުންނަ ތަނެވެ. އަދި މާސްކު އަޅައިގެން އޭނާ ހުރިއިރު، ކައިރީގައި އޭނާގެ ސެކިއުރިޓީން ކަމަށް ބެލެވޭ އިތުރު ބަޔަކު ވެސް ތިބޭ ތަން ފެނިގެންދެ އެވެ.

ޝާހްރުކް މީގެ ކުރިން ޓައިމްސް އޮފް އިންޑިއާ އަށް ދިން އިންޓަވިއުއެއްގައި ބުނެފައި ވަނީ ހައްޖުގެ އަޅުކަން އަދާކުރުމަށް އަދި ނުދާ ކަމަށެވެ.

"ހައްޖުގެ އަޅުކަމަކީ ހަމަ ޔަގީނުން ވެސް އަޅުގަނޑުގެ އެޖެންޑާގައި އޮތް ކަމެއް. ދަރިފުޅު އާރިޔަން އާއި އަންހެން ދަރިފުޅު ސުހާނާއާއެކު ހައްޖުގެ އަޅުކަން ކުރަން ދާން ބޭނުން،" އޭނާ ބުނެފައިވެ އެވެ.

ޝާހްރުކްގެ "ދުންކީ" ބައެއް މަންޒަރުތައް ސައުދީގައި ނަގާފައިވާއިރު މި ފިލްމުގެ މަންޒަރުތަކެއް އިނގިރޭސިވިލާތާއި އެމެރިކާ އަދި ކެނެޑާގެ އިތުރުން ޔޫއޭއީގައި ވެސް ނެގުމަށް ވަނީ ހަމަޖެހިފަ އެވެ.

ކުޅަދާނަ ޑައިރެކްޓަރު ހިރާނީއާ ޑައިރެކްޓްކޮށްފައިވާ މިފިލްމަކީ ގާނޫނާއި ހިލާފަށް ހިޖުރަ ކުރުމާ ގުޅޭ ގޮތުން ތައްޔާރުކޮށްފައިވާ ފިލްމެކެވެ.

މި ފިލްމު ސިނަމާތަކަށް ގެންނަން ތާވަލުކޮށްފައި އޮތީ އަންނަ އަހަރުގެ ޑިސެމްބަރު މަހުގެ ފަހުކޮޅު އެވެ.

"ދުންކީ" އަކީ އަންނަ އަހަރަށް އޮތް ޝާހްރުކްގެ ތިން ފިލްމުގެ ތެރެއިން ފަހު ފިލްމެވެ. ފުރަތަމަ ފިލްމަކީ އަންނަ މަހުގެ 25 އަށް ތާވަލުކޮށްފައި އޮތް "ޕަތާން" އެވެ. މީގެ އާ ޕޯސްޓަރެއް ވެސް މިއަދު ވަނީ ދައްކާލައިފަ އެވެ. ސިދާތު އާނަންދު ޑައިރެކްޓްކޮށްފައިވާ މި ފިލްމުގެ ކާސްޓްގައި ދީޕިކާ ޕަދްކޯނާއި ޖޯން އަބްރަހަމް ވެސް ހިމެނެ އެވެ.

ދެވަނަ ފިލްމަކީ ޖޫން 2 އަށް ތާވަލުކޮށްފައި އޮތް ތަމަޅަ ޑައިރެކްޓަރު އެޓްލީގެ "ޖަވާން" އެވެ.