މޯލްޑިވްސް ޑްރިފްޓް އެސޯސިއޭޝަނުން ބޭއްވި އެއްވުމާއި ގުޅިގެން ޒުވާނުން ހައްޔަރު ކުރަމުންދާތީ ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމް ރައީސުލްޖުމްހުރިއްޔާ އިބްރާހީމް މުހައްމަދު ސޯލިހަށް ފާޑުވިދާޅުވެއްޖެ އެވެ.

ޝިޔާމް ރައީސް ސޯލިހަށް ފާޑުވިދާޅުވެ ކަންބޮޑުވުން ފާޅުކުރެއްވިއިރު ޑްރިފްޓް އެސޯސިއޭޝަނުން މިދިޔަ ބުރާސްފަތި ދުވަހުގެ ރޭ ހުޅުމާލޭގައި ބާއްވަން އުޅުނު ރޭސިން އިވެންޓަށް ފުލުހުންވަނީ ހުރަސް އަޅަފަ އެވެ.

ޒުވާނުން ހުޅުމާލޭ ޕޮލިސް ކުރިމަތީގައި އިހްތިޖާޖުކުރީ އެ އިވެންޓް ކުއްލިއަކަށް ހުއްޓުވުމާ ގުޅިގެންނެވެ. އަދި އިހްތިޖާޖުގައި ބައިވެރިވި ޒުވާނުން ފުލުހުންދަނީ މިހާރު ހައްޔަރުކުރަމުންނެވެ.

ޝިޔާމް ވަނީ މިއީ ރައީސް ސޯލިހު އެ ވިދާޅުވާ ގޮތަށް ހުރިހާ ކުޅިވަރަކަށް ހަމަހަމަ ފުރުސަތު ދެއްވުންތޯ ސުވާލު ކުރައްވާފަ އެވެ.

ޑްރިފްޓް އެސޯސިއޭޝަނުން ބޭއްވި އެއްވުމުގައި ބައިވެރިވި މީހުން ހައްޔަރު ކުރާތީ ޑްރިފްޓިން އެސޯސިއޭޝަނުން ވެސް ވަނީ ކަންބޮޑުވުން ފާޅުކޮށްފަ އެވެ. އެގޮތުން ކަންބޮޑުވުންފާޅުކޮށް އެ އެސޯސިއޭޝަނުން ކޮށްފައިވާ ފޭސްބުކް ޕޯސްޓެއްގައި ބުނީ، ބުރާސްފަތި ދުވަހުގެ ރޭ އެ އެސޯސިއޭޝަންގެ ބަޔަކު ހުޅުމާލޭ ޕޮލިސް ސްޓޭޝަން ކުރިމަތީ އެއްވި އެއްވުމުގެ ތެރެއިން އެއްވެސް ހަމަނުޖެހުމެއް ނުހިނގާ ކަމަށާ، އަދި އެ އެއްވުމާއި ގުޅިގެން ފުލުހުން ހިތްހަމަ ނުޖެހޭ އެއްވެސް ކަމެއް ހިނގާފައިވާނަމަ އެ އެސޯސިއޭޝަނުން އެކަމުގެ ޒިންމާ ނަގަން ތައްޔާރު ކަމަށެވެ.

"ނަމަވެސް ފުލުހުން ވަކިވަކި މީހުން އެކަމާއި ގުޅުވައިގެން ހައްޔަރު ކޮށް މުއްދަތު ޖަހަން ގެންދިޔުން މި އެސޯސިއޭޝަނަށް ބަލައިގަންނަން ދަތި." ޑްރިފްޓް އެސޯސިއޭޝަނުން ބުނެފައިވެ އެވެ.