ފަލަސްތީނުގެ ޣައްޒާއަށް އިސްރާއީލުން މިހާރު ދެމުންގެންދާ ހަމަލާތައް ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފި އެވެ.

ރާއްޖޭގެ ފޮރިން މިނިސްޓްރީން މިއަދު ހަވީރު ނެރުނު ނޫސް ބަޔާނެއްގައި ވަނީ އިސްރާއީލުގެ ހަމަލާތަކުގެ ސަބަބުން ފަލަސްތީނުގެ ކުށެއް ނެތް އާއްމުން ޝަހީދުވެ ޒަހަމްވަމުންދާ ކަމަށާއި އެ އެންމެންގެ އާއިލާތަކަށް ދިވެހި ސަރުކާރާއި ދިވެހި ރައްޔިތުން ހަމްދަރުދީ ފާޅުކުރާ ކަމަށެވެ.

އިސްރާއީލުން ހިފާފައިވާ ފަލަސްތީނުގެ ސަރަހައްދުތަކުގައި އަންހެނުންނާއި ކުޑަކުދިން ހިމެނޭ ގޮތަށް ހަތިޔާރެއް ނެތް އާއްމުންނާ ދެކޮޅަށް އެ ގައުމުން ބާރުގެ ބޭނުންކުރާތީ ދިވެވި ސަރުކާރުން ވަނީ ކަންބޮޑުވުން ފާޅުކޮށްފަ އެވެ.

ފަލަސްތީނުގެ ބިންތައް އިސްރާއީލުން ހިފަމުން ދަނީ ބައިނަލްއަގްވާމީ ގާނޫނުތަކާއި އދ. ގެ އާއްމު މަޖިލީހާއި ސަލާމަތީ މަޖިލީހުން ފާސްކޮށްފައިވާ ގަރާރުތަކާ ހިލާފަށް ކަމަށް ރާއްޖޭން ގަބޫލުކުރާ ގަބޫލުކުރުން މިއަދުވެސް ވަނީ ތަކުރާރުކޮށްފަ އެވެ.

އެ ބަޔާނުގައި ވަނީ ދިވެހި ސަރުކާރުން ދެކޭ ގޮތުގައި މި މައްސަލައަށް ދާއިމީ ސުލްހައެއް އަންނާނީ މިނިވަން ފަލަސްތީނެއް އުފެދޭ ދެ ދައުލަތުގެ ހައްލެއް ގެނެސް ކަމަށެވެ. އެގޮތުން އިތުމަތީ ގުދުސްއަކީ ފަލަސްތީނުގެ ވެރިރަށް ކަމުގައި 1967 ވަނަ އަހަރުގެ ކުރިއަށް އޮތް ބޯޑަރާ އެއްގޮތަށް ކަނޑައަޅަންޖެހޭ ކަމަށް ވެސް އެ ބަޔާނުގައިވެ އެވެ.