މަގު ހުރަސް ކުރާ މީހުންނަށް ހާއްސަ ލައިޓްތަކެއް ހުޅުމާލޭގެ މަގުތަކުގައި ހަރުކުރަން ފަށައިފި އެވެ.

އެޗްޑީސީގެ މީޑިއާ އޮފިޝަލަކު މިއަދު ވިދާޅުވީ މަގު ހުރަސްކުރާ މީހުންނަށް ހާއްސަ ލައިޓްތައް ހަރުކުރަނީ ދުއްވާ އެއްޗިއްސަށާއި ހިނގާ މީހުންގެ ރައްކާތެރިކަމަށް ކަމަށެވެ.

"މި މަޝްރޫއުގެ ދަށުން އާއްމުކޮށް މީހުން ހުރަސްކުރާ ބޮޑެތި މަގުތަކުގައި ލައިޓް ހަރުކުރާނެ. މި ލައިޓްތަކަކީ ހިނގާ މީހުން މަގު ކުރަން ވީމަ ބޭނުންކުރަން ހާއްސަ ލައިޓްތަކެއް،" އޭނާ ވިދާޅުވި އެވެ.

އެ އޮފިޝަލް ވިދާޅުވީ މަގުތަކުގައި ހަރުކުރާ ލައިޓްތަކަކީ ދުނިޔޭގެ ކުރިއަރާފައިވާ ގިނަ ގައުމުތަކުގައި ވެސް މިހާރު ބޭނުންކުރާ ކަހަލަ ތިން ކުލައިން ދިއްލޭ ލައިޓްތަކެއް ކަމަށެވެ.

މާލޭގެ މަގުތަކުގައި ހަރުކޮށްފައިވާ ޓްރެފިކް ލައިޓްތަކާ ހިލާފަށް މި ލައިޓްތައް ފެހި ކުލައިން ދިއްލޭނީ ލައިޓް ޕޯސްޓްގައި ހުންނަ ބަޓަނަކަށް އޮބާލުމުން ވަކި އިރެއް ވަންދެނެވެ. އަދި ވަގުތު ހަމަވުމުން ރީނދޫ ކުލައަށް ބަދަލުވުމަށް ފަހު ރަތްކުލައަށް ބަދަލުވާނެ އެވެ.

ހުޅުމާލޭގެ މަގުތަކުގައި ހަރުކުރާ ޕެޑެސްޓްރިއަން ކްރޮސިން ލައިޓްތައް ދިއްލުމަށް ބޭނުންކުރަނީ ސޯލާ ޕަވާ އެވެ.

ހުޅުމާލޭގެ މަގުތަކުގައި މަގު ހުރަސްކުރާ ލައިޓް ހަރުކުރުމުގެ މަސައްކަތްކުރަނީ. ފޮޓޯ: އެޗްޑީސީ

މި މަޝްރޫއަށް ހަރަދުވާނެ މިންވަރެއް އަދި ހަރުކުރަނީ ކިތައް ލައިޓްކަމެއް އެޗްޑީސީއަކުން ނުބުނެ އެވެ.

ލައްކައަކަށް ވުރެ ގިނަ މީހުން ދިރިއުޅޭ ހުޅުމާލޭގެ ދުއްވާ ވެހިކަލްތަކުގެ އަދަދު ވަރަށް ބޮޑަށް އިތުރުވެ، ނުރައްކާތެރި އެކްސިޑެންޓްތައް ހިނގާ މިންވަރު ވެސް އަންނަނީ އިތުރުވަމުންނެވެ.