ބޮލީވުޑްގެ މަޝްހޫރު ތަރިންކަމުގައިވާ ސަލްމާން ޚާން އާއި، ކެޓްރީނާ ކެއިފްގެ ލޯބީގެ ވާހަކަތަކަކީ އިންޑިއާގެ ފިލްމު އިންޑަސްޓްރީގައި ދޭތެރެއިން ދެކެވޭ ވާހަކަތަކެކެވެ.

ދެތަރިންވެސް އެދެމީހުންގެ އެކްޓުކުރުމުގެ ހުނަރުން އާންމުންގެ މަގުބޫލުކަން ހޯދާފައިވާއިރު، އެދެމީހުންގެ ޖޯޑަކީވެސް ގިނަ ބަޔަކަށް ކަމުދިޔަ ޖޯޑެކެވެ. ނަމަވެސް އެދެމީހުންގެ ލޯބީގެ ގުޅުން ކުއްލިއަކަށް ނިމެން ޖެހުނު ސަބަބު ހާމަވީ ވަރަށް ފަހުންނެވެ.

އެނގިފައިވާގޮތުގައި، ކެޓްރީނާ ހިންދީ ފިލްމު އިންޑަސްޓްރީއަށް ތައާރަފްކުރީ ސަލްމާނެވެ. އަދި އޭރު އެދެމީހުންގެ މެދުގައިވެސް ލޯބީގެ ގުޅުން ވާކަމަށް މައުލޫމާތު ލިބިފައިވެ އެވެ. އޭގެ ފަހުން ދެތަރިންވެސް އެދެމީހުންގެ ލޯބީގެ ގުޅުން ކުރިއަށް ގެންގޮސްފައިވަނީ އާންމުންނަށް ސިއްރުކުރުމެއް ނެތި އެވެ.

ނަމަވެސް ކެޓްރީނާ އާއި މަޝްހޫރު ތަރި ރަންބީރު ކަޕޫރު އެކީގައި ކުޅުނު ފިލްމުކަމަށްވާ 'އަޖަބް ޕްރޭމްކީ ގަޒަބް ކަހާނީ' ގައި އެދެތަރިންވެސް ވަނީ ލޯބީގެ ގޮތުން ގުޅިފަ އެވެ. އަދި ކެޓްރީނާ ވަނީ ސަލްމާނާއި އެކީގައި އޮތް ލޯބީގެ ގުޅުން ނިންމާލާފަ އެވެ. މައުލޫމާތު ލިބޭގޮތުގައި އޭނާ ސަލްމާނާއެކު ގުޅުން ނިންމާލާފައިވަނީ ފިލްމުގެ ޝޫޓިންގައި ހުރެ ކުރި މެސެޖަކުންނެވެ.

ރަންބީރާއެކު އޮތް ގުޅުން ކަނޑާލުމަށް ފަހު ކެޓްރީނާ އަނެއްކާވެސް ސަލްމާނާއެކު ގުޅުނު ހަބަރުތައް އިވިފައިވެ އެވެ. އެހެންނަމަވެސް އެގުޅުން މާ ގިނަ ދުވަހަކު ދެމިގެންގޮސްފައެއް ނުވެ އެވެ.

ކެޓްރީނާ ދާދި ފަހުން ވަނީ މަޝްހޫރު ތަރި ވިކީ ކޯޝަލްއާ ކައިވެނީގެ ގޮތުން ގުޅިފަ އެވެ. އެހެންނަމަވެސް ކެޓްރީނާއަ ވަކިވިފަހުން ސަލްމާނު މިހާތަނަށް އެއްވެސް މީހަކާއި ލޯބީގެ ގޮތުން ގުޅުނު ކަމުގެ ހަބަރެއް ނުފެތުރެ އެވެ.