މަސްތުވާތަކެތީގެ މައްސަލާގައި މިދިޔަ އަހަރު ހައްޔަރުކުރި ބޮލީވުޑްގެ މަޝްހޫރު ތަރި ޝާހްރުކް ޚާންގެ ދަރިފުޅު އާރިޔަން ހާންގެ ޕާސްޕޯޓު ހިފަހައްޓާފައި އޮތުމަށްފަހު ދޫކޮށްލައިފި އެވެ.

މިދިޔަ ބުދަ ދުވަހު މުމްބާއީ ކޯޓުން ވަނީ އާރިޔަންގެ ޕާސްޕޯޓް ދޫކޮށްލުމަށް އަމުރުކޮށްފަ އެވެ.

އާރިޔަނާއި އޭނާގެ އެކުވެރިންތަކެއް މިދިޔަ އަހަރުގެ އޮކްޓޯބަރު މަހުގެ 2 ވަނަ ދުވަހުގެ ރޭ ހައްޔަރުކުރީ މުމްބާއީގެ ފަޅު ބޭރުގައި އޮތް ކްރޫޒް ލައިނާއެއްގައި މަސްތުވާތަކެއްޗާ އެކު ޕާޓީކުރާ ކަމަށް ލިބުނު ރިޕޯޓަކާ ގުޅިގެން ހިންގި އޮޕަރޭޝަނެއްގަ އެވެ. އެ މައްސަލާގައި އަރިއަން ޖަލުގައި ހައްޔަރުކޮށް 28 ދުވަސް ފަހުން ދޫކުރީ ކަފާލާތުގެ ދަށުން މިދިޔަ އަހަރުގެ ނޮބެމްބަރު މަހުގެ 30 ގަ އެވެ.

އެ މައްސަލާގައި 14 މީހެއްގެ މައްޗަށް ދައުވާ ކުރަން ކޯޓަށް ފޮނުވި އިރު ލިސްޓުގައި އާރިޔަންގެ ނަމެއް ނެތެވެ. އަދި އޭނާގެ މައްޗަށް ތުހުމަތު ކުރެވޭ ކަންތަކުގައި އަސާސެއް ނެތުމުން އޭނާ އަށް ކޯޓުން ވަނީ “ކްލީން ޗިޓު” ވެސް ދީފަ އެވެ.

އެ މައްސަލާގައި އާރިޔަންއަށް ކުރެވުނު ތުހުމަތު ތަކުގައި އަސާސެއް ނެތް ކަމަށާއި، އޭނާގެ މައްޗަށް ކުރެވުނު ތުހުމަތުތަކާއި ޖަލުގައި ހުންނަން ޖެހުމުން އަބުރަށް ހުތުރުވިކަމަށް އާރިޔަން ވަނީ ބުނެފަ އެވެ.