އެމްޑީޕީގެ ފައުންޑަރު ގޯގޯ ލަތީފު އަވަހާރަވެއްޖެ

އެމްޑީޕީގެ ފައުންޑަރު އަދި ވިޔަފާރިވެރިޔާ މުހައްމަދު ލަތީފު (ގޯގޯ ލަތީފު) މިއަދު އަވަހާރަވެއްޖެ އެވެ.

ލަތީފު އަވަހާރަވީ އާލާސްކަންފުޅާ އުޅުއްވާތާ ދުވަސްކޮޅެއްފަހުން ރޭ ދަންވަރު 3:00 ގައި ސްރީލަންކާގެ ނަވަލޯކާ ހޮސްޕިޓަލުގަ އެވެ.

ރައީސް މައުމޫން އަބްދުލްގައްޔޫމުގެ ވެރިކަމުގައި 2003 ވަނަ އަހަރުގެ ސެޕްޓެމްބަރު މަހު އީވާން ނަސީމް ޖަލުގައި މަރާލި ހާދިސާއާ ގުޅިގެން އުފެދުނު ހަމަނުޖެހުމުގެ ތެރެއިން، ރާއްޖޭގައި ސިޔާސީ ޕާޓީ ރަޖިސްޓްރީ ކުރުމުގެ ހުއްދަ ނުލިބުމުން އެ އަހަރުގެ ނޮވެމްބަރު މަހު އެމްޑީޕީ ސްރީލަންކާގައި އިއުލާން ކުރެއްވިއިރު، އެންމެ އިސް ދައުރެއް އަދާކުރެއްވި އެއް ބޭފުޅަކީ ގޯގޯ ލަތީފެވެ.

ގޯގޯ ލަތީފް ވަނީ ކުރީގެ ރައީސް މުހައްމަދު ނަޝީދުގެ ވެރިކަމުގައި ދައުލަތުގެ ހިއުމަން ރައިޓްސް އެމްސެބެޑަރުގެ މަގާމު ވެސް އަދާކުރައްވާފަ އެވެ.

ނަމަވެސް 2012 ވަނަ އަހަރުު ރައީސް ނަޝީދުގެ ވެރިކަން ނިމުނު ފަހުން ވެސް އޭނާ އެމްޑީޕީގެ ބައެއް މުޒާހަރާތަކުގައި ބައިވެރިވި އެވެ. އެކަމަކު އޭގެ ފަހުން ސިޔާސީ ހަރަކާތްތަކުގައި ގޯގޯ ލަތީފް ނުފެނެ އެވެ. އަދި ބައްޔާ ގުޅިގެން އޭނާ ފަހަކަށް އައިސް ދިރިއުޅުއްވަމުން ގެންދެވީ އާއިލާއާއެކު ސްރީލަންކާގަ އެވެ.

ގޯގޯ ލަތީފު ކިޔަވާ ވިދާޅުވީ ސްރީލަންކާގެ ކެންޑީގެ ޓްރިނިޓީ ކޮލެޖުންނާއި ކޮލަމްބޯގެ ރޯޔަލް ކޮލެޖުންނެވެ.

ލަތީފު ސިޔާސީ އެކުވެރިޔާ އެމްޑީޕީގެ ރައީސް މުހައްމަދު ނަޝީދު ވިދާޅުވީ ލަތީފުއަކީ އެ މަނިކުފާނުގެ ހަޔާތުގައި ދިމާވި ވަރަށް ހިތްހެޔޮ، ތެދުވެރި، ވަފާތެރި، ވިސްނުންތެރި، އަދި އެހާމެ ހިތްވަރުގަދަ އެއް ބޭފުޅެއް ކަމަށެވެ.

އޭނާ އަވަހާރަވުމާ ގުޅިގެން އެމްޑީޕީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒް އިސްމާއިލް ވިދާޅުވީ އެމްޑީޕީގެ ފައުންޑާ މެމްބަރު މުހައްމަދު ލަތީފްއަކީ އެ ޕާޓީ ވުޖޫދަށް ގެނެސް ދިވެހިރައްޔިތުންގެ އިންސާނީ ހައްގުތައް ހޯދާދިނުމަށް ގިނަގުނަ މަސައްކަތްތަކެއް ކުރައްވާ އަދި އަގުނުކުރެވޭ ގުރުބާނީތަކެއް ވެފައިވާ ހިތްވަރުގަދަ ދިވެހި ދަރިއެއް ކަމަށެވެ.

ލަތީފު އަވަހާރަވުމާ ގުޅިގެން އެމްޑީޕީ އާއި މި ސަރުކާރުގެ އިސްވެރިންނާއި ސިޔާސީ ބޭފުޅުން ގެންދަވަނީ ހިތާމަފާޅުކުރައްވައި، އާއިލާއަށް ތައުޒިޔާ ވިދާޅުވަމުންނެވެ.

ގދ. ތިނަދޫ މަޝްހޫރު ހިރިހަމާދު ކަލޭގެފާނުގެ ދަރިކަލުން ލަތީފު ވަނީ 80 ގެ އަދި 90 ގެ އަހަރުތަކުގައި ބައެއް ރިސޯޓުތައް ހިންގެވުމުގައި އިސްކޮށް އުޅުއްވި އެވެ. އަދި ފަހުން ބައެއް ވިޔަފާރިތައް ފުޅާ ދާއިރާއެއްގައި އަމިއްލައަށް ވެސް އޭނާ ހިންގެވި އެވެ.

މާލޭގައި މިހާރު ވެސް ފުޅާ ދާއިރާއެއްގައި ހެދުމާއި ފޮތީގެ ވިޔަފާރިކުރާ ކަލާސް ގްރޫޕްގެ އެއް ހިސާދާރަކީ ވެސް ލަތީފެވެ. އެ ކުންފުނީގެ ފިހާރަތަކުގެ ތެރޭގައި މަޝްހޫރު ސިންދިތާ، ވަންނަވާ، ޖިންސުއްލަތީފު، ކަލާސް، ލޫޅާފަތި، އޭމަލާ ހިމެނެ އެވެ.

ލަތީފު ވަނީ ދިވެހި ވިޔަފާރިވެރިންގެ ޖަމިއްޔާ ހިންގެވުމުގެ އިސް ދައުރެއް ވެސް އަދާކުރައްވާފަ އެވެ.