އިލްޔާސް ވަހީދު (އިއްލެ)ގެ އައި ފިލްމްސްއިން ގެނެސްދޭ ޑްރާމާ ސިލްސިލާ "ބިރުވެރި ވާހަކަ"ގެ ދެވަނަ ބައިގެ ޓްރެއިލާ ނެރެފި އެވެ.

އައިފިލްމްސް އިން ކިޔައިދޭން ފަށާފައިވާ "ބިރުވެރި ވާހަކަ" ސީރީޒްގެ ފުރަތަމަ ބައި "ފޯން ކޯލް" ވަނީ މިދޔަ ހަފްތާގެ ހުކުރު ދުވަހު ބެލުންތެރިންނާ ހިސާބަށް ގެނެސްދީފަ އެވެ.

ބިރުވެރި ވާހަކަ "ފޯނު ކޯލު" ފެށިގެން ގޮސްފައިވާ ދެވަނަ ބައިގެ ޓްރެއިލާ މިހާރު ވަނީ އާންމުކޮށްފަ އެވެ. މިފަހަރު ބިރުވެރި ވާހަކައިން ކިޔައިދެނީ "ލަކުނު"ގެ ވާހަކަ އެވެ.

ކުރީގެ ބަޔާ އެއްފަދައިން "ލަކުނު"ވެސް ބިރުވެރި އެތައް ކަމެއް ފެނިގެންދެ އެވެ.

https://www.youtube.com/watch?v=p6Y6SAACd6Y&t=1s

"ބިރުވެރި ވާހަކަ" އަކީ އާދަޔާ ހިލާފު ބިރުވެރި ސީރީޒްއަކަށްވާއިރު މިއީ ދިވެހި އޯޑިއެންސަށް ޝައުގުވެރިވާނެ ސިފަތައް ހިމަނައިގެން ތައްޔާރުކޮށްފައިވާ ސީރީޒްއެކެވެ.

ހަމަ އެކަނި ދިރާގު ޓީވީ އަދި ދިރާގު ޕްލޭ ވީޑިއޯ އޮން ޑިމާންޑުން ބަލައިލެވޭނެ މި ސީރީޒަކީ އިއްލެ ޑައިރެކްޓްކޮށް ގެނެސްދޭ ސީރީޒެކެވެ. މީގެ ޕްރޮޑިއުސަރަކީ ފިލްމު "ބަވަތި" އަދި "ނީނާ" ގެ އިތުރުން އައިފިލްމްސްގެ އުފެއްދުންތައް ޕްރޮޑިއުސްކުރަމުން އަންނަ ޒުވާން ޕްރޮޑިއުސަރ އާސިމް އަލީ އެވެ.

ބިރުވެރި ވާހަކައިގެ ފުރަތަމަ ބައި "ފޯން ކޯލް" މިހާރު ދިރާގު ޓީވީން ބެލޭނެ އެވެ. އަދި މި ސީޒަންގެ އެކި ބައިތައް ސިލްސިލާކޮށް ކޮންމެ ހަފްތާއަކު ހުކުރު ދުވަހު ދިރާގު ޓީވީން ގެންނާނެ އެވެ.