އާރަދްޔާގެ އުފަންދުވަހު އަބީޝޭކްގެ ހިލަމެއް ނެތް!
މަސްފެންގަނޑު މަރާތުކޮށް ހަވާލުކުރުމަށް ރަސްމިއްޔާތެެއް
ތޫނުއެއްޗަކުން ފުލުހަކަށް ހަމަލާދޭން އުޅުނު މީހަކު ހައްޔަރުކޮށްފި
ދުވަސްކޮޅެއްގެ މެދުކެނޑުމަކަށްފަހު ސްޓެލްކޯގެ މުވައްޒަފުންނަށް ދެމުން ގެންދާ ހައްޖާއި އުމްރާގެ ފުރުސަތު އަލުން ދޭން ފަށައިފި އެވެ.
ސްޓެލްކޯގެ ހައްޖުގެ އަޅުކަމުގެ ފުރުސަތަށް ޝަރުތު ހަމަވަނީ ކުންފުނީގެ 15 އަހަރު ހިދުމަތް ކުރައްވާފައިވާ މުވައްޒަފުންނަށެވެ. އަދި އުމްރާގެ އަޅުކަމުގެ ފުރުސަތައް ކުރިމަތިލެވެނީ ފަސް އަހަރު ހިދުމަތް ކުރައްވާފައިވާ މުވައްޒަފުންނަށް ކަމަށް ވެސް އެ ކުންފުނިން ބުންޏެވެ.
އެގޮތުން ރަމަޟާން މަސް އިހްޔާ ކުރުމަށާއި ކުންފުނީގެ ފަރާތުން މުވައްޒަފުންނަށް ރޭ ބޭއްވި ތަރާވީހުގައި ދެ މުވައްޒަފަކަށް ހައްޖުގެ ފުރުސަތު އަދި ދެ މުވައްޒަފަކަށް އުމްރާގެ ފުރުސަތު ވަނީ ދީފަ އެވެ.
އުމްރާގެ އަޅުކަމުގެ ފުރުސަތު ލިބުނު މުވައްޒަފުންނަކީ ވިލިނގިލީ އިންޖީނުގޭގެ އަބްދުﷲ ޝަފީގާއި ކޯޕަރޭޓް އެންޑް ލީގަލް އެފެއާޒް ޑިޕާޓްމަންޓްގެ ސަމީރާ ހުސައިން އެވެ.
ހައްޖުގެ އަޅުކަމުގެ ފުރުސަތު ލިބުނު މުވައްޒަފުންނަކީ، ޓްރާންސްޕޯޓް، ލޮޖިސްޓިކްސް އެންޑް މެއިންޓަނެންސް ޑިޕާޓްމަންޓްގެ މުހައްމަދު އަބޫބަކުރު އަދި ކަސްޓަމާ ސަވިސަސް އެންޑް ބިލިން ޑިޕާޓްމަންޓުގެ ނަޒްނާ އަހުމަދެވެ.
ހައްޖާއި އުމްރާގެ ފުރުސަތު ލިބުނު މުވައްޒަފުންނަށް އެކަމުގެ ލިއުން ހަވާލުކޮށްދެއްވީ އިސްލާމިކް މިނިސްޓަރު ޑރ. އަހުމަދު ޒާހިރާއި މެނޭޖިން ޑިރެކްޓަރު އަހުމަދު ޝަރީފެވެ.
މި ތަރާވީހުގައި ޝަރީފު ވަނީ ރަމަޟާން މަސް އިހްޔާ ކުރުމަށް ސްޓެލްކޯގައި އުފެދިފައި އޮތް ސަގާފަތް އަލުން ފެށީ ކަމަށާއި ކުންފުނިން ދެމުންގެންދިޔަ ހައްޖު އަދި އުމްރާގެ ފުރުސަތުތައް ދުވަސްކޮޅެއްގެ މެދުކެނޑުމަކަށްފަހު އަލުން ދޭން ފެށުނުކަން ފާހަގަކުރައްވައިފަ އެވެ. އަދި ރަމަޟާން މަހަކީ ބަރަކާތުން ފުރިގެންވާ މައްސަރަކަށްވުމުން، އެ މަހުގެ ބަރަކާތްތެރިކަން ހާސިލުކުރެވޭތޯ ހުރިހާ މުވައްޒަފުން ވެސް ގަދައަޅާ މަސައްކަތް ކުރުމަށާއި ވީހާ ވެސް ގިނައިން ގުރުއާން ކިޔެވުމަށާއި ޒިކުރުކުރުމަށާއި އަޅުކަން ކުރުމުގައި ދެމި ތިބުމަށް އިލްތިމާސްކޮށް، ނަސޭހަތްތެރިވި އެވެ.
ޝަރީފު ވިދާޅުވީ، މުވައްޒަފުންނަށް ކުންފުނިން ފޯރުކޮށްދެމުންގެންދާ އިނާޔަތްތަކާއި ކަންކަމުގެ ބަދަލުގައި ހަމައެކަނި ބޭނުންފުޅުވަނީ ހެޔޮހިތުން، ހިނިތުންވުމާ އެކު ރައްޔިތުން އެދޭ ފަދަ ރަނގަޅު ހިދުމަތްތަކެއް އިހުލާސްތެރިކަމާ އެކު އެ ރައްޔިތުންނަށް ދެމުން ގެންދިއުން ކަމަށެވެ. އަދި ރައްޔިތުން އަޅުގަނޑުމެންގެ ހިދުމަތް ބަލައިގަންނަ ކަމުގެ އިހްސާސް ކުރެވުން އެއީ މަގުސަދު ހާސިލުވުން ކަމަށް ވެސް އޭނާ ވިދާޅުވި އެވެ.
އުމްރާގެ ފުރުސަތު ލިބުނު ސަމީރާ ހުސައިން ބުނީ ކޮންމެ އަހަރަކު ވެސް ކުރިމަތިލައިގެން މިފަހަރު އެ ފުރުސަތު ލިބުނީތީ ވަރަށް އުފާވާ ކަމަށާއި އެ ފުރުސަތު ލިބުނީތީ ހެއްދެވި ފަރާތަށާއި މެނޭޖްމަންޓަށް ޝުކުރު އަދާކުރާ ކަމަށެވެ. އަދި ހައްޖުގެ ފުރުސަތު ލިބުނު މުހައްމަދު އަބޫބަކުރު ބުނީ ލިބިގެން މިދިޔައީ ވަރަށް ބޮޑު ނިއުމަތެއް ކަމަށެވެ.
"ވަރަށް ހަމްދު ކުރަން އިނގޭތޯ. މި ލިބިގެން ދިޔައީ ވަރަށް ބޮޑު ނިއުމަތެއް. އަޅުގަނޑު އެދެނީ އަބަދުވެސް މުވައްޒަފުންނަށް ފައިދާ ހުރި މިފަދަ ގިނަ ފުރުސަތުތައް ހުޅުވާލައި، މިފަދަ ކަންކަން މެނޭޖްމަންޓުގެ ފަރާތުން ކުރަމުން ގެންދިއުން. ހާއްސަކޮށް، މި ފުރުސަތު ލިބުން މެދުކެނޑިފައިވަނިކޮށް، މެނޭޖިން ޑިރެކްޓަރު ޝަރީފް އަލުން މިފުރުސަތު ހުޅުވައިދެއްވީތީ ވަރަށް ބޮޑު ޝުކުރެއް ދަންނަވަން ބޭނުން،" މުހައްމަދު ބުންޏެވެ.
