ކީވް (19 އޭޕްރީލް) - ކުރިއަށް އޮތް މަދު ހަފްތާތަކުގެ ތެރޭގައި ޔޫކްރެއިންއަށް ޔޫރަޕިއަން ޔޫނިއަން (އީޔޫ)ގެ މެމްބަރުކަން ލިބިދާނެ ކަމަށް އެ ގައުމުގެ ރައީސް ވޮލްޑިމީރް ޒެލެންސްކީ ވިދާޅުވެއްޖެ އެވެ.

ޒެލެންސްކީ މިހެން ވިދާޅުވެފައި މިވަނީ އީޔޫ މެމްބަރުކަމަށް އެދި ހުށައަޅާ ލިޔެކިޔުންތައް ފުރިހަމަކޮށް، އެ ޖަމިއްޔާގެ ސަފީރެއް ކަމަށްވާ މެއިޓީ މާސިކަސް އެރުވުމަށް ބޭއްވި ރަސްމިއްޔާތަކަށް ފަހު އެވެ.

ޒެލެންސްކީ އިތުމަށް ވިދާޅުވީ މިއަދަކީ ބައިނަލްއަގްވާމީ މިނިވަންކަން ހޯދުމަށްޓަކައި ޔޫކްރެއިން ކުރަމުންދާ މަސައްކަތުގައި ކަޑައްތު ކުރެވުނު އިތުރު މަރުހަލާއެއް ކަމަށެވެ.

"މިއީ މުހިއްމު ފިޔަވަޅެއް. ގައުމެއްގެ ގޮތުގައި އަމިއްލަ ފައިމައްޗަށް ތެދުވެ މިނިވަން ޚިޔާލުފާޅު ކުރުމަކީ ޔޫކްރެއިންގެ ހައްގެއް،" ޒެލެންސްކީ ވިދާޅުވި އެވެ.

އޭޕްރީލް މަހުގެ 8 ވަނަ ދުވަހު ޔޫކްރެއިންއަށް އީޔޫގެ މެމްބަރުކަމަށް ދައުވަތު އަރުވަމުން އެ ޖަމިއްޔާގެ ރައީސް އުރްސުލާ ވޮން ޑޭރް ލެޔެން ވިދާޅުވީ ޔޫކްރެއިން ނިސްބަތްވަނީ ޔޫރަޕްގެ އާއިލާއަށް ކަމަށާއި އެ ގައުމަށް އީޔޫގެ މެމްބަރުކަން ހޯދުމަށް ކުރަން ޖެހޭ ކަންކަން ހަލުވިކަމާއެކު ކޮށް ނިންމަން މަސައްކަތް ކުރާނެ ކަމަށެވެ.

ޔޫކްރެއިންއިން އީޔޫގައި ބައިވެރި ވުމަކީ މިހާރު ކުރިއަށްދާ ރަޝިއާ-ޔޫކްރެއިން ހަނގުރާމައިގައި އެ ގައުމަށް އިތުރު ވަރުގަދަކަމެއް ލިބޭނެ ކަމެއް ކަމަށް ތަޖުރިބާކާރުން ލަފާ ކުރެ އެވެ.