ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އަށް އެކި ފަރާތްތަކުން ކުލީގެ ގޮތުގައި ދައްކަންޖެހޭ ފައިސާ ބަލައިގަންނަނީ އެޗްޑީސީގެ ޕޯޓަލާއި އެޗްޑީސީގެ އޮފީހުން ކަމަށް އެ ކުންފުނިން ބުނެފި އެވެ.

އެޗްޑީސީން ބުނީ އެ އެ ކުންފުންޏާއި އެކި ފަރާތްތަކާމެދު ގަނެ ވިއްކުމަށާއި ކުއްޔަށް ދޫކުރުމަށްވެފައިވާ އެއްބަސްވުންތަކުގެ ދަށުން، ދައްކަންޖެހޭ ފައިސާ، ބޭންކް ކައުންޓަރު، އޭޓީއެމް އަދި އިންޓަނެޓް ބޭންކިންގެ ޒަރީއާއިން އެޗްޑީސީގެ އެކައުންޓްތަކަށް ބައެއް ފަރާތްތަކުން ޖަމާކުރަމުން އަންނަ ކަމަށެވެ.

ނަމަވެސް އެ ގޮތަށް ދައްކާ ފައިސާ ދެއްކީ ކޮންފަރާތަކުން، ކޮންބިމަކަށް ނުވަތަ ކޮން އެއްމެދު- އިމާރާތަކަށްކަން ދެނަގަތުމަށް ދަތިތަކެއް ދިމާވަމުންދާ ކަމަށް އެޗްޑީސީން ބުންޏެވެ.

އެޗްޑީސީން ބުނީ މިކަންކަން މިހެން ދިމާވާތީ މިމަހުގެ އެއްވަނަ ދުވަހުން ފެށީގެން ބޭންކް ކައުންޓަރު، އޭޓީއެމް އަދި އިންޓަނެޓް ބޭންކިން (އެކައުންޓް ޓްރާންސްފާ)ގެ ޒަރީއާއިން އެ ކުންފުނިން ފައިސާބަލައި ނުގަންނާނެ ކަމަށެވެ. އަދި މިމަހުގެ އެއްވަނަ ދުވަހުން ފެށިގެން އެ އެޗްޑީސީއަށް ފައިސާ ދެއްކުމަށް އެ ކުންފުނިން ތައާރަފް ކޮށްފައިވާ "މައިހުޅުމާލެ" ވެބް ޕޯޓަލް ލިންކް މެދުވެރިކޮށް އޮންލައިންކޮށް ނުވަތަ އެޗްޑީސީގެ މައި އޮފީހުގައި ފައިސާ ބަލައިގަތުމަށްޓަކައި ހާއްސަ ކޮށްފައިވާ ކައުންޓަރުތައް މެދުވެރިކޮށް ފައިސާ ދެއްކުމަށް އެޗްޑީސީން ވަނީ އަންގާފަ އެވެ.