ރާއްޖެއާއި ތުރުކީއާ ދެމެދު އޮންނަ ގުޅުން އިތުރަށް ‌‏ބަދަހިކުރުމަށް ދެ ގައުމުން ވެސް ޝައުގުވެރިވާ ދާއިރާތަކުން ކުރެވިދާނެ ކަންކަމާ މެދުގައި ރައީސް އިބްރާހިމް މުހައްމަދު ސޯލިހާއި ތުރުކީގެ ފޮރިން މިނިސްޓަރު މަޝްވަރާ ކުރައްވައިފި އެވެ.

މިމަޝްވަރާތައް ކުރައްވާފައިވަނީ މިއަދު ރައީސް އޮފީހުގައި ތުރުކީގެ ފޮރިން މިނިސްޓަރު މެވްލުތު ޝަވުޝުގްލުއާއެކު ރައީސް ސޯލިހު ބޭއްވި ބައްދަލުކުރެއްވުމުގަ އެވެ.

މި ބައްދަލުކުރެއްވުމުގައި ރައީސް ސޯލިހު ވަނީ ތުރުކީގެ ފޮރިން މިނިސްޓަރު ރާއްޖެ ވަޑައިގެންނެވުމާ ގުޅިގެން އެމަނިކުފާނަށް މަރުހަބާ ވިދާޅުވެފަ އެވެ. އަދި އެމަނިކުފާނު ވަނީ ތުރުކީގެ ރައީސް ރެކެޕް ތައްޔިބް އެރްދުގާންއަށް ހެޔޮ އެދުންތައް އަރިސްކުރެއްވުމަށް ތުރުކީގެ ފޮރިން މިނިސްޓަރުގެ އަރިހުގައި ދަންނަވާފަ އެވެ. ތުރުކީގެ ފޮރިން މިނިސްޓަރު ވަނީ އެ ގައުމުގެ ރައީސްގެ ހެޔޮއެދުންތައް ރައީސަށް ވެސް އަރިސްކުރައްވާ ކަމުގައި ވިދާޅުވެފަ އެވެ.

ރައީސް ވަނީ ‏ރާއްޖެއާއި ތުރުކީއާ ދެ ގައުމުގެ ދެމެދުގައި ޒަމާނުއްސުރެ އޮތް އެކުވެރި ގުޅުމުގެ މައްޗަށް އަލިއަޅުއްވާލައްވައި ވާހަކަފުޅު ދައްކަވާފަ އެވެ. މިގޮތުން، އެމަނިކުފާނު ވަނީ މިދިޔަ އަހަރު އެއީ ރާއްޖެއާއި ތުރުކީއާ ދެމެދުގައި ސިޔާސީ ގުޅުން ގާއިމުކުރިތާ 42 އަހަރު ފުރުނު އަހަރުކަން ފާހަގަކުރައްވާފަ އެވެ. އަދި، ތުރުކީގެ ފޮރިން މިނިސްޓަރު ރާއްޖެއަށް މިހާރު ކުރައްވާ ދަތުރުފުޅަކީ އެ ގައުމުގެ ސަރުކާރުން ރާއްޖޭއާ ތުރުކީއާ ދެމެދު އޮންނަ ގުޅުން ބަދަހިކުރުމަށް ދެއްވާ މުހިންމުކަން ރަމްޒުކޮށްދޭ ކަމެއް ކަމުގައި އެމަނިކުފާނު ވިދާޅުވި އެވެ.

މި ބައްދަލުކުރެއްވުމުގައި ދެބޭފުޅުން ވަނީ ރާއްޖެއާއި ތުރުކީއާ ދެމެދުގައި އޮންނަ ގުޅުން އިތުރަށް ‌‏ބަދަހިކުރެއްވުމަށް ދެ ގައުމުން ވެސް ޝައުގުވެރިވާ ދާއިރާތަކުން ކުރެވިދާނެ ކަންތައްތަކަށް އަލިއަޅުއްވައިލައްވައި ފުޅާ ދާއިރާއެއްގައި މަޝްވަރާ ކުރައްވާފަ އެވެ. މިގޮތުން، ދެގައުމުގެ ދެމެދުގައި އިގްތިސާދީ ގޮތުން ގުޅުން ބަދަހިކުރުމާއި، ވައިގެ ދަތުރުފަތުރު އިތުރުކުރުމާއި، ފަތުރުވެރިކަން ވަރުގަދަކުރުމާއި، މަސްވެރިކަމުގެ ދާއިރާ ތަރައްގީކުރުމާއި، އުމްރާނީ ތަރައްގީ އާއި، މޫސުމަށް އަންނަ ބަދަލުތަކުން އަރައިގަތުމަށް ގުޅިގެން މަސައްކަތްކުރުމާ ގުޅޭގޮތުން ދެ ބޭފުޅުން މަސްވަރާކުރެއްވި އެވެ. މީގެ އިތުރުން ވެސް ނިރުބަވެރިކަން ހުއްޓުވުމަށް މަސައްކަތްކުރުމާއި، އަނިޔާވެރިކަމާއި، ހައްދުފަހަނަ އަޅާ ދިޔުމާ ދެކޮޅަށް ގުޅިގެން މަސައްކަތްކުރުމާ ގުޅޭގޮތުން ވެސް ދެ ބޭފުޅުން ވަނީ މަސްވަރާކުރައްވާފަ އެވެ.

މި ބައްދަލުކުރެއްވުމުގައި ރައިސް ސޯލިހާއި ތުރުކީގެ ފޮރިން މިނިސްޓަރު ވަނީ މިއަދުގެ ވަގުތެއްގައި ދެ ގައުމުގެ ދެ ސަރުކާރުގެ ދެމެދުގައި ގުޅުން ބަދަހިކުރުމުގެ ގޮތުން ސޮއިކުރުމަށް ހަމަޖެހިފައިވާ ފަސް އެއްބަސްވުމަކަށް އަލިއަޅުއްވާލައްވާފަ އެވެ.

ރައީސުލްޖުމްހޫރިއްޔާ އިތުރަށް ދެއްކެވި ވާހަކަފުޅުގައި، އެމަނިކުފާނު ވަނީ ރާއްޖޭގެ ކޮވިޑް ދިފާއު ވެކްސިން ކެމްޕެއިނަށް ތުރުކީގެ ސަރުކާރުން 20،000 ޑޯޒުގެ ސިނޮވެކް ވެކްސިން ޝިޕްމަންޓް ހަދިޔާކުރެއްވުމަށް ނިންމަވާފައިވާތީ، އެކަމަށްޓަކައި ތުރުކީވިލާތުގެ ސަރުކާރަށް ޝުކުރު އަދާކުރައްވާފަ އެވެ.

ބައްދަލުކުރެއްވުން ނިންމަވާލައްވަމުން ރައީސް ސޯލިހާއި، ތުރުކީވިލާތުގެ ފޮރިން މިނިސްޓަރު ވަނީ ދެ ގައުމުން ވެސް ޝައުގުވެރިވާ ދާއިރާތަކުން އަދި ދެގައުމަށް ވެސް ލާބައާއި މަންފާ ލިބޭ ކަންކަމުގައި ކުރިޔަށް އޮތް ދުވަސްތަކުގައި ގުޅިގެން އެކުގައި މަސައްކަތް ކުރާނެ ކަމުގައި ވިދާޅުވެފަ އެވެ.

ރާއްޖެއާއި ތުރުކީން ސިޔާސީ ގުޅުން ގާއިމުކޮށްފައިވަނީ 28 މެއި 1979 ގަ އެވެ.