ހިޔާ ފްލެޓްތަކުގެ ލިފްޓް ކައިރީގައި ތޮއްޖެހުން ކުޑަ ކުރުމަށްޓަކައި އެސަރަހައްދުގައި ޖާގަ އިތުރުކުރުމުގެ މަސައްކަތް ފަށައިފި އެވެ.

ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން ބުނީ ހިޔާ ފްލެޓްތަކުގެ ލިފްޓު ހިމެނޭ ލޮބީ ބޮޑުކުރަން ނިންމާފައިވަނީ ބާރުބޮޑު ގަޑިތަކުގައި ލިފްޓު ކައިރީގައި ތޮއްޖެހުން ކުޑަކޮށް، އާންމުންނަށް ލުއިފަސޭހަ ކޮށްދިނުމުގެ ގޮތުން ކަމަށެވެ.

ލިފްޓް ހިމެނޭ ލޮބީގެ ސަރަހައްދު ބޮޑު ކުރަނީ ބައެއް ފާރުތައް ތަޅާލައިގެން ކަމަށް ވެސް އެ ކުންފުނިން ބުނެ އެވެ.

ހިޔާ ފްލެޓްގެ ކޮންމެ ޓަވަރެއްގައި 25 ބުރި ހުންނައިރު، ކޮންމެ ޓަވަރެއްގައިވެސް ހުންނަނީ ހަތަރު ލިފްޓެވެ. ނަމަވެސް ލިފްޓު ކައިރީގައި މަޑުކުރާނެ ޖާގަ ކުޑަވެ، ބާރުބޮޑުވާ ގަޑިތަކުގައި ތޮއްޖެހޭ މައްސަލާގައި އާންމުން ކަންބޮޑުވުން ފާޅުކޮށްފައި ވެސް އެބަ ހުއްޓެވެ.

ނަމަވެސް، ފްލެޓްތަކުގެ ލޮބީ ބޮޑުކުރުމުން އާންމުންގެ ދަތިތަކަށް ހައްލެއް ލިބިގެން ދާނެ އެވެ.

ކުރީގެ ސަރުކާރުން ހުޅުމާލެ ދެވަނަ ފިޔަވަހީގައި ތަރައްގީކޮށްފައިވާ 25 ބުރީގެ 16 ޓަވަރުގައި މިހާރު ގިނަ ޢަދަދެއްގެ ބަޔަކު ދިރިއުޅެމުންދާއިރު ރައީސް ސޯލިހުގެ ސަރުކާރަށް ތިން އަހަރު ވެގެން ދިޔައިރު ވެސް އެ ސަރަހއްދުގައި އަސާސީ ހިދުމަތްތައް ފެށިފައި ނުވާތީ ގިނަ ބަޔަކު އަންނަނީ ނުރުހުން ފާޅުކުރަމުންނެވެ. އަދި އެސަރަހައްދުގެ މަގުތައް ހެދިފައިނުވާތީ ގިނަ ފަރާތްތަކަށް ދަތިތަކެއް އަންނަނީ ކުރިމަތިވަމުންނެވެ.