ބޮލީވުޑްގެ މަޝްހޫރު ބަތަލާ ކަރީނާ ކަޕޫރު ޕޮޒިޓިވްވުމާ ގުޅިގެން، އިތުރު 10 ތަރިން ކޮވިޑުގެ އަލާމާތްތައް ހުރިތޯ ބަލައި ޓެސްޓުކުރަން ހަމަޖެހިއްޖެ އެވެ.

ދާދި ފަހުން ޑައިރެކްޓަރު ކަރަން ޖޯހަރު އޭނާގެ ގޭގައި ބޭއްވި ޕާޓީއަކަށް ބޮލީވުޑްގައި އޭނާ އެންމެ ގާތްކޮށް ގުޅުން ބާއްވާ ފަންނާނުންނާއެކީ ޕާޓީއެއް ބާއްވާފައިވާއިރު، ކަރީނާ ވެސް އެ ޕާޓީއަށް ދިޔަ އެވެ. އަދި ޕާޓީއަށް ދިޔަތާ މާގިނަ ދުވަހެއް ނުވެ، ކޮވިޑަށް ޕޮޒިޓިވްވުމާ ގުޅިގެން، ޕާޓީއަށް ދިޔަ ހުރިހާ އެންމެން ވެސް ހިމެނެނީ ޑައިރެކްޓް ކޮންޓެކްޓުންގެ ތެރޭގަ އެވެ.

މިއާއެކު ކޮވިޑުގެ އަލާމާތްތައް ހުރިތޯ ބަލައި ޓެސްޓުކުރަން ޖެހިދާނެ ފަންނާނުންގެ ތެރޭގައި، މަލައިކާ އަރޯރާ، އަރްބާޒް ހާން، ކަރަން ޖޯހަރް، ކަރިޝްމާ ކަޕޫރް، އަރްޖުން ކަޕޫރް، އާލިއާ ބާޓްގެ އިތުރުން މަހީޕް ކަޕޫރް އާއި ސީމާ ޚާން ހިމެނެ އެވެ.

ކަރީނާގެ އިތުރުން ކަރީނާގެ އެންމެ ގާތް އެކުވެރިޔާ އަމްރިތާ އަރޯރާ ވެސް ވަނީ ކޮވިޑަށް ޕޮޒިޓިވްވެފަ އެވެ. މިދެ މީހުން ވެސް މިވަގުތު ތިބީ ހޯމް ކަރަންޓީނުގަ އެވެ.

ކޮވިޑްގެ ސަބަބުން އަޅާފައިވާ ފިޔަވަޅުތަކަށް ލުއި ދިނުމާއެކު ކަރީނާ ވަނީ މީގެ ކުރިން ރާއްޖޭގައި ޗުއްޓީއެއް ވެސް ހޭދަކޮށްފަ އެވެ.