މާލޭ ސިޓީ ކައުންސިލުން ހުޅުމާލޭގެ ރަޖިސްޓްރީ އިއްޔެ ބާތިލުކުރުމުން އެކަމާ ހިތްހަމަނުޖެހިގެން، އެ ނިންމުން ބާތިލުކުރުމަށާއި އެޗްޑީސީއަށް ލިބުނު ގެއްލުމުގެ ބަދަލު ހޯދަން ކަމަށް ބުނެ ސިވިލް ކޯޓަށާއި ލޯކަލް ގަވަމެންޓް އޮތޯރިޓީ (އެލްޖީއޭ) އަށް އެ މައްސަލަ ހުށަހަޅައިފި އެވެ.

ސިޓީ ކައުންސިލާއި އެޗްޑީސީގެ ކޯޅުން ބޮޑުވެފައިވަނިކޮށް، އެ ކައުންސިލުން އިއްޔެ ބޭއްވި ބައްދަލުވުމުގައި ވަނީ އެޗްޑީސީ އަށް ރަޖިސްޓަރީ ކޮށްފައިވާ ހުޅުމާލޭގެ ރަޖިސްޓަރީ ބާތިލުކޮށް، ކައުންސިލުގެ ދަށަށް މުޅި ހުޅުމާލެ ބަދަލުކުރަން ފާސްކޮށްފަ އެވެ.

އެ ނިންމުން ކުށްވެރިކޮށް އެޗްޑީސީން ނެރުނު ބަޔާނެއްގައި ބުނެފައިވަނީ ކައުންސިލްގެ ނިންމުމަކީ މުދާ ހޯދުމާއި މުދާ ލިބިގަތުމުގެ އަދި ބިމާ ބެހޭ ގާނޫނާއި ލާމަރުކަޒީ ގާނޫނާވެސް ހިލާފު ނިންމުމެއް ކަމަށެވެ. އަދި އެހެން ބައެއްގެ އަތުގައި އޮތް ބިމެއްގެ ބެލެނިވެރިކަން ދެވޭނީ ޝަރުއީ ކޯޓަކަށް ކަމަަށް ވެސް ވަނީ ބުނެފަ އެވެ. އެހެންކަމުން އެ ނިންމުމަކީ ގާނޫނާ ހިލާފު ނިންމުމެއް ކަމަށް ކަނޑައަޅައި، އެނިންމުން ބާތިލުކޮށް އަދި ގާނޫނީ އިމުގެ ތެރެއިން ކަންކުރުމަށް ސިޓީ ކައުންސިލަށް އެނގުމަށް އެ މައްސަލަ ސިވިލް ކޯޓަށް ހުށަހެޅުމުގެ އިތުރުން އެލްޖީއޭއަށް ހުށަހަޅާފައިވާނެ ކަމަށް އެޗްޑީސީން މިއަދު ވަނީ ބުނެފަ އެވެ.

މާލޭގެ މޭޔަރު ޑރ. މުހައްމަދު މުއިއްޒު މިއަދު ވިދާޅުވީ އާ ކައުންސިލް އިންތިހާބުވުމާއި އެކުގައި ލާމަރުކަޒީ ގާނޫނުގެ ދަށުން ހުޅުމާލެ ކައުންސިލްގެ ދަށަށް ގެނައުމަށް ރައީސް އިބްރާހީމް މުހައްމަދު ސޯލިހާ މަޝްވަރާކުރެއްވި ކަމަށެވެ. ހުޅުމާލެ، މާލެ ސިޓީ ކައުންސިލާ ހަވާލުކުރައްވާނެ ކަމުގެ ޔަގީންކަން ރައީސް ދެއްވި ނަމަވެސް މިއަދު މަންޒަރު ބަދަލުވެފައިވާ ކަމަށާއި، އާ ސިޓީ ކައުންސިލަށް ހަ މަސް ފުރުނު އިރުވެސް ސަރުކާރުގެ އެއްބާރުލުން ނުލިބޭ ކަމަށް މުއިއްޒު ވަނީ ވިދާޅުވެފަ އެވެ.